Janeiru-Jullu: Servisu Saúde Likisá rejista dengue 211 no mate na’in-tolu
DILI, 03 Setembru 2025 (TATOLI)—Diretór Servisu Saúde Munisípiu Likisá, Luís Manuel, informa Servisu Saúde Munisípiu Likisá hahú husi Janeiru to’o Jullu 2025 ne’e, rejista kazu dengue hamutuk na’in-211 no husi númeru ne’e ema na’in-tolu (3) mak mate.
“Husi kazu 211 ne’e mai husi Postu Administrativu haat ne’ebé mak iha Munisípiu Likisá, maibé kazu sira-ne’e barak liu husi Postu Administrativu Likisá Villa,” Diretór Servisu Saúde Munisípiu Likisá ne’e hateten ba Agência Tatoli, liuhusi telefónika, ohin.
Nia informa, iha ne’e kazu barak liu ne’e mai husi Sentru Saúde Komunitáriu Likisá vila hamutuk 72 kazu, Sentru Saúde Komunitáriu Maubara 65 no husi númeru na’in-rua mate (2), Sentru Saúde Komunitáriu Bazartete 71 no husi númeru ne’e na’in-ida (1) mak mate no Sentru Saúde Komunitáriu Loes rejista na’in-haat (4),” nia hateten.
Atu halo prevensaun, nia dehan, daudaun ne’e Servisu Saúde Munisípiu Likisá nafatin kontínua halo promosaun edukasaun saúde ba komunidade no estudante sira, oinsá atu halo prevensaun ba moras dengue ne’e.
“Kona-ba prevensaun ne’ebé mak ita hala’o iha Munisípiu Likisá, ita iha promosaun saúde hala’o hahú husi suku to’o aldeia liuhusi programa SISCA, Programa Integradu saúde no movel klínika. Ita hala’o mós prevensaun halo fumigasaun ba kada família sira-ne’ebé mak deteka kazu pozitivu dangue no mós sira-nia viziñu no halo mós abate ba tanke sira-ne’ebé mak tau bee iha laran, atu nune’e bele hamenus susuk nia tolun, nune’e bele prevene moras dengue iha Munisípiu Likisá ne’e rasik,” nia dehan.
Jornalista : Felicidade Ximenes
Editór : Cancio Ximenes
