Jurista husu Governu aselera instalasaun Supremu Tribunál Justisa
DILI, 03 Setembru 2025 (TATOLI)—Jurista Alexadre Corte-Real husu ba Governu atu aselera instalasaun Supremu Tribunál Justisa hodi mellora serbisu iha setór justisa.
“Instalasaun Supremu Tribunál Justisa ne’e nesesáriu tanba ita dékanda rua liu ona seidauk iha Supremu Tribunál Justisa. Tanba ne’e, tempu ona atu instala daudaun ona hodi mellora di’ak liu serbisu Tribunais hodi fó asesu justisa ba povu di’ak liután,” Jurista hateten ba Jornalista Ajénsia TATOLI iha nia knaar fatin, Universidade Nasionál Timor-Lorosa’e (UNTL), Kuarta ne’e.
Nia dehan, durante ne’e Tribunál Rekursu mak halo Supremu Tribunál Justisa nia serbisu, nune’e prosesu hotu para iha Tribunál Rekursu.
“Povu bainhira la konkora ho prosesu ruma atu rekorre rekursu ba Supremu Tribunál labele tanba seidauk iha. Ha’u sente ita iha ona rekursu no fatin ba instalasaun Supremu Tribunál Justisa, hein ajusta tan buat balun para instala daudaun ona, ne’e nesesáriu duni,” nia katak.
Tuir Jurista ne’e, Tribunál Rekursu labele halo Supremu Tribunál Justisa nian knaar dala-ida de’it tanba ladún di’ak.
“Tanba ne’e mak implika interpretasaun oinoin ne’e, ita tenke fahe juíz sé mak tuur iha Supremu Tribunál Justisa no Tribunál Rekursu,” nia akresenta.
Notísia relevante : TR propoin adisionál hodi harii Supremu Tribunál Justisa
Alexadre Corte-Real husu ba Prezidente Tribunál Rekusu atu aselera promosaun ba juíz sira tanba daudaun ne’e foin iha juíz dezembargadór na’in-haat ne’ebé halo knaar iha Tribunál Rekursu.
“Entaun ba oin Prezidente Tribunál Rekursu tenke halo desizaun ida para promove juíz sira agora iha segunda klase ba primeira klase no juíz ida-ne’ebé daudaun primeira klase bele promove ba juíz konselleiru ona para prepara rekursu ba tuur iha Supremu Tribunál Justisa,” nia tenik.
Juíz sira ne’ebé mak atu ba tuur iha Supremu Tribunál Justisa ne’e kompostu husi ema na’in-hitu, na’in-haat nu’udar juíz karreira no na’in-tolu seluk ne’e kompostu husi ida reprezenta husi Prezidensia Repúblika, Parlamentu Nasionál no ema profisionál maibé iha koñesimentu kona-ba area justisa nian.
“Sira-na’in tolu ne’e Parlamentu Nasionál mak sei halo rekrutamentu tuir Lei Organizasaun Judisiáriu haruka. Ha’u espera katak ba rekrutamentu juíz sira ne’ebé halo husi Parlamentu sei laiha konflitu interrese no laiha tendénsia polítika,” nia hatutan.
Jornalista : Natalino Costa
Editora : Julia Chatarina
