MJ submete ona karta autorizasaun ba instalasaun Sentru Reabilitasaun Juvenil iha Tibar
DILI, 03 Setembru 2025 (TATOLI)—Diresaun Nasionál Servisu Prizionál no Reinsersaun Sosiál iha Ministériu Justisa (MJ) submete ona karta ba Ministériu Obra Públika (MOP) hodi husu autorizasaun ba instalasaun Sentru Reabilitasaun Juvenil iha Tibar, Postu Administrativu Bazartete, Munisípiu Likisá.
“Pedidu kona-ba atu hari Sentru Juvenil haruka ona ba Diresaun Jerál Abitasaun no Urbanizasaun iha Ministériu Oras Públika. Tanba ne’e, hein deit rezultadu ne’ebé sei mai,” Diretór Nasionál Servisu Prizionál no Reinsersaun Sosiál iha MJ, Delfio Soares Alves hateten ba jornalista sira iha nia knaar fatin MJ, Kolmera Kuarta ne’e.
Nia dehan, pedidu ne’e ho objetivu atu husu autorizasaun, verifika no husu termu referénsia ba Sentru Juvenil maibé hein tempu ruma iha rezultadu maka sei halo prosesu kontinuasaun fali ba oin.
Notísia relevante : PDHJ husu PN komunika Governu estabelese sentru reabilitasaun juvenil ba menoridade
Iha fatin ketak, Jurista Alexadre Corte-Real hateten, presiza instala Sentru Juvenil atu tau dadur sira ne’ebé ho idade kiik.
“Timor-Leste iha tempu ona atu instala Sentru Juvenil, tanba ohin loron ita seidauk iha fatin ida ketak hodi tau dadur juvenil sira, maibé iha de’it maka prizaun tolu,” nia akresenta.
Tuir Jurista dadur sira ne’ebé ho idade kiik presiza tau iha fatin ketak liuhusi atividade sira ne’ebé di’ak.
“Sentru Juvenil ne’e importante tanba atu transforma sira-nia hanoin, liliu atu hadook sira (labarik minoridade) labele halo prátika krime. Dala barak públiku kestiona kona-ba minoridade komete krime barak liu. Tanba ne’e, to’o ona tempu atu halo mudansa, oinsá atu kria sentru juvenil ida no iha atividade sira ne’ebé espesífiku ba juvenil sira atu muda sira-nia hanoin husi konflitu,” nia katak.
Jornalista : Natalino Costa
Editora : Julia Chatarina
