MSSI prepara tan karreta funeráriu foun haat
DILI, 03 Setembru 2025 (TATOLI)—Ministériu Solidariedade Sosiál no Inkluzaun (MSSI) daudaun ne’e prepara tan karreta funeráriu foun haat hodi reforsa servisu sosiál iha nasionál.
“Kareta funeráriu foun hamutuk haat iha tinan ida-ne’e hodi reforsa nasionál maibé daudaun ne’e seidauk entrega mai MSSI, iha hela kompaña Toyota Unipesoal Lda atu modifika. Tanba karreta funeráriu bainhira kompañia sira ba sosa lori mai sei halo modifika, nia laran tau nia lampu no sira seluk tan no lakleur tan karreta funeráriu foun haat ne’e entrega mai MSSI hodi utiliza atu tula mate-isin,” Diretór Jerál MSSI, Florencio Pina Dias Gonzaga informa ba Jornalista Ajénsia TATOLI, iha nia knaar fatin, MSSI, Kaikoli, Kuarta ne’e.
Diretór nota katak númeru mate dala ruma barak, husi nasionál posiblidade ajuda autoridade munisípiu ne’ebé presiza tulun no hakarak ka lakohi tenke apoiu karreta funeráriu ba sira hodi tula mate-isin bá munisípiu.
Nia dehan, karreta funeráriu iha nasionál hamutuk 12 maibé ida avaria hela no ida ba VIP nian.
“Karreta funeráriu ho kondisaun a’at no Diresaun Nasionál sei halo manutensaun,” nia akresenta.
Notísia relevante : MSSI sei sosa tan karreta funeráriu lima
Orsamentu ne’ebé atu sosa karreta funeráriu foun haat ho montante rihun $180 no prosesu pagamentu hotu ba kompañia Toyota Unipesoal Lda.
Diretór Jerál Servisu Koorporativu iha MSSI, Fernando dos Reis informa, kompañia Toyota mak manán konkursu sosa ambulánsia haat no karreta operasionál haat.
“Ami sosa veíkulu no kompañia Toyata mak manán, agora asina ona akordu no hein de’it fornesimentu husi kompañia,” nia tenik.
Planu kompra veíkulu ne’e atu hatán ba difikuldade transporte iha nasionál.
“Ba manán ne’e ita tau osan hamutuk rihun $500, no kada karreta sei kona rihun $45 no iha balun ne’ebé liu tanba ita sosa de’it mak karreta no sei modifika fali ambunlánsia tanba ne’e la hanesan.” Diretór esplika.
Governu aprova $26.188.602 iha proposta Orsamentu Jerál Estadu (OJE) 2025 hodi kontinua fó prioridade programa servisu no atendimentu sosiál ba povu.
“OJE 2025 ami-nian $26.188.602 hodi aloka ba saláriu vensimentu $3.982.088, bens no servisu $10.744.951, transferénsia públika $9.501.672, kapitál menór rihun $500 no kapitál dezenvolvimentu $1.459.891. Ami iha programa prioridade rua mak hanesan dezenvolvimentu instituisionál no servisu no atendimentu sosiál,” Ministra Solidariedade Sosiál no Inkluzaun,” Verónica das Dores tenik.
Jornalista : Osória Marques
Editora : Julia Chatarina
