DILI, 03 Setembru 2025 (TATOLI)–Governu Nova Zelándia oferese oportunidade ba timoroan atu hasa’e abilidade liuhusi formasaun profisionál ba kurtu prazu, liuhusi programa bolsa estudu Manaaki Nova Zelándia.
Programa ida-ne’e permite partisipante sira atu partisipa iha formasaun profisionál ho klase mundiál iha Nova Zelándia, tantu pesoalmente ka online, ba durasaun semana ida to’o fulan-12.
“Governu Nova Zelándia oferese programa bolsa estudu ba formasaun profisionál nian ba timoroan,” referidu nota husi pájina Nova Zelándia.
Notísia relevante : Nova Zelándia iha tinan 2026 aumenta kuota 32 bolsa estudu Manaaki ba timoroan
Partisipante sira bele estuda to’o fulan-12 iha Nova Zelándia iha nível diploma 3-6.
Bolsa estudu ida-ne’e oferese programa formasaun profisionál hamutuk 20 mak hanesan :
Saúde no moris di’ak :
- Sertifikadu iha Enfermajen Veterinária
- Diploma iha Saúde no Bem-estar
- Diploma iha Edukasaun no Kuidadu Infánsia
Teknolojia no Enjeñaria :
- Diploma iha Dezenvolvimentu Web
- Sertifikadu iha Enjeñaria Elétrika
- Sertifikadu iha Enjeñaria Automotiva
- Sertifikadu iha Siberseguransa
- Sertifikadu iha Kanalizasaun
Negósiu no jestaun :
- Diploma iha Jestaun Ospitalidade
- Diploma iha Negósiu (Lideransa no Jestaun)
- Sertifikadu iha Supervizaun Restaurante nian
- Diploma iha Transporte no Lojístika Internasionál – Diploma iha Karga no Lojístika Internasionál
Kreativu no mídia :
- Diploma iha Jornalizmu (Multimedia)
- Diploma iha Produsaun Ekran
- Diploma iha Dezeñu Dijitál Animasaun no Produsaun Filme
- Sertifikadu iha Arte Maquiajen
- Sertifikadu iha Terapia Beleza nian
- Sertifikadu iha Kabeleiru (Apoiu Salon)
- Sertifikadu Turizmu Aventura no Orientasaun
Tráfiku no Transporte :
- Diploma iha Kontroladór Tráfiku Aéreu
Aplikasaun hahú loke ona no sei taka iha loron 21 Setembru 2025 to’o tuku 17:00 lorokraik. Aplikasaun bele manda liuhusi email ba: Dili.Scholarships@mfat.govt.nz
Kritériu elejibilidade ba aplikante sira mak hanesan sidadaun timoroan pelumenus ho idade tinan 18, pelumenus iha esperiénsia serbisu tempu-tomak tinan-ida ka tinan-rua tempu-parsiál, hetan apoiu hosi empregadór ba formasaun, no la hetan esperiénsia terminasaun bolsa estudu Manaaki iha tinan-lima ikus ne’e.
Bolsa estudu ida-ne’e alvu ba profisionál sira husi nasaun parseiru sira ne’ebé hakarak haforsa sira-nia abilidade liuhusi kursu sira ho fornesedór formasaun sertifikadu sira iha Nova Zelándia, kolokasaun serbisu, ka formasaun online.
Iha serimónia asina Entendimentu Operasionál Inter-Ajénsia (IAOU) entre Governu Timor-Leste no Nova Zelándia iha eskritóriu SEFOPE iha loron 21 Agostu 2025, Embaixadora Nova Zelándia iha Timor-Leste, Helen Tunnah, afirma kompromisu nasaun nian atu apoia dezenvolvimentu rekursu umanu Timor-Leste.
Nia dehan, katak kuota bolsu estudu kompletu Manaaki ba estudante Timor-Leste sei aumenta husi 12 ba 32 hahú iha tinan akadémiku 2026.
To’o agora, estudante Timor-Leste na’in-75 mak partisipa iha programa formasaun oioin iha Nova Zelándia, inklui bolsa estudu formasaun ba tempu badak, no formasaun lian Inglés.
Antes ne’e, eis-Embaixadór Nova Zelándia nian, Philip Hewitt, hatete iha tinan 2023, maizumenus estudante Timor-Leste na’in 300 maka estuda ona iha Nova Zelándia.
Jornalista : Osória Marques
Editora : Julia Chatarina
