DILI, 03 Setembru 2025 (TATOLI)—Prosesu reabilitasaun ba sítiu turístiku relijiozu Na’in-Feto Ramelau iha hela faze mobilisasaun ekipamentu husi kompañia lokál lima (5) ne’ebé konkorre ba konkursu públiku hodi kontinua halo jestaun iha semana oin ne’e.
Notísia Relevante: MTA prioriza atu dezenvolve sítiu turístiku relijiozu Na’in-Feto Ramelau
Diretór Dirasaun Nasionál Dezenvolvimentu Turístiku iha Ministériu Turizmu no Ambiente (MTA), Luís Imanuel Doutel hateten atividade reabilitasaun iha Na’in-Feto Ramelau ne’e la’o hela no ida-ne’e kategória hanesan pilotu dezenvolve sítiu turístiku relijiozu la’ós turizmu komunitária.
“Projetu ne’e kontinuasaun husi programa prioridade Ministériu Turizmu nian ne’ebé permite iha tinan ida-ne’e. Tanba ne’e kompañia sira hahú mobiliza ona sira-nia ekipamentu hodi halo jestaun ba projetu ne’e rasik, kuaze kompañia lima maka sei halo jestaun iha fatin ne’ebá, projetu ne’e ho durasaun fulan lima hahú husi fulan-Agostu no sei ramata iha fulan-dezembru. Antes ne’e mós ita reabilita ona eskadária no konstrui toilrt ida iha parte santuáriu nian,” Diretór ne’e informa ba Agência Tatoli iha nia kna’ar fatin, Vila-Verde, ohin.
Maibé, nia dehan, ba tinan ida-ne’e isei dezenvolve tan iha parte balun hanesan sei konstrui tan toilet ida ho unidade rua iha post 2 ne’ebé lokaliza besik iha kapela nian, parte seluk sei aumenta tan eskadária ba eskada sira-ne’ebé ezistente ona hodi fasilita ema atu la’o.
Atividade ne’ebé sei halo implementasaun iha Na’in-Feto Ramelau hamutuk lima hanesan, konstinusaun halo eskadária to’o Ramelau tutun, halo moru protesaun iha santuáriu, instalasaun iluminasaun iha dalan (street light), konstrusaun foun ba toilet no konstrusaun estasionamentu iha santuáriu.
Enkuantu, bainhira projetu ne’e mak seidauk finaliza tuir data ne’ebé iha, entaun sira sei kontinua subtitui fali iha tinan oin, tanba antes ne’e mós Ministériu Turizmu no Ambiente (MTA) submete ona proposta adisionál ba dezenvolvimentu turizmu nian.
Aleinde ne’e, Dirasaun Dezenvolvimentu Turístiku mós koloka ninia ema na’in-11 hodi halo kontrolu no jestaun ba fatin referidu.
Programa prioridade ne’e prevee husi Orsamentu Jerál Estadu (OJE) 2025 ho montante millaun $4-resin.
Notísia Relevante: Don Virgílio apresia jestaun MTKI ba sítiu Ramelau
Jornalista : Alexandra da Costa
Editór : Cancio Ximenes
