DILI, 06 Agostu 2025 (TATOLI) – Ministériu Turizmu no Ambiente (MTA) liuhusi Dirasaun Nasionál Dezenvolvimentu Turístiku (DNDT), tinan ida-ne’e, tau prioridade hodi kontinua dezenvolve sítiu turístiku Na’in-Feto Ramelau (Tatamailau) ne’ebé lokaliza iha munisípiu Ainaru, postu-administrativu Hatubuiliku.
Diretór Nasionál Dezenvolvimentu Turístiku, Luís Imanuel Doutel, hateten, tinan ida-ne’e, sira define ona proposta ba programa prioridade sira hodi dezenvolve sítiu turizmu relijiozu ne’ebé antes ne’e sira indika Na’in-Feto Ramelau hodi halo reabilitasaun ba eskada, estrada, estabelese haris-fatin, kafetária, barraka no fatin sunu ahi (api ungu).
“Entaun haris-fatin (toilet) ne’ebé sira sei estabelese iha área santuáriu nian, ne’ebé ho modelu rua hanesan unidade ba feto no unidade ba mane, importante seluk mak kria fatin api ungu nian, tanba selae vizitante sira ba sunu ai hodi tamun ne’e bele estraga plantasaun sira iha ne’ebá bainhira tempu anin ruma”, Diretór ne’e esplika ba Ajénsia TATOLI iha nia knaar fatin, Vila-Verde, ohin.
Notísia relevante: https://tatoli.tl/2019/10/01/vizita-nain-feto-ramelau-presiza-kontribui-dolar-ida/
Tanba ne’e, nia afirma, ita haree katak, fatin ne’e atrai tebes ema barak mak ba vizita tantu vizitante lokál no mós ema estranjeiru sira, entaun ita presiza dezenvolve fatin ne’e ho di’ak nune’e bele atrai tan ema barak no mós bele garante nesesidade vizitante sira-nian iha ne’ebá.
“Antes ne’e mós ami hamutuk ho tékniku sira ba halo ona observasaun ba target (alvu) fatin referida, tanba ne’e planu sira sei envolve kompañia lokál neen hodi halo konstrusaun sítiu turizmu ne’e”, membru governante ne’e haktuir.
Nia dehan, proposta sira-ne’e agora iha hela prosesu aprovizionamentu interna Ministériu Turizmu Ambiente nian, hein katak finaliza ona maka sira sei kontinua implementa iha tempu-badak nia laran.
Entretantu, Dirasaun Nasionál Dezenvolvimentu Turístiku mós estabelese ninia ema na’in-11 hodi halo kontrolu no jestaun ba fatin referidu, no programa prioridade hirak-ne’e preve husi Orsamentu Jerál Estadu (OJE) 2025 ho montante rihun-haat liu ($4 mil).
Jornalista: Alexandra da Costa
Editór: Rafael Ximenes de A. Belo
