Governu inaugura Sentru Apoiu Kankru Feto iha Fundasaun Alola
DILI, 04 Setembru 2025 (TATOLI)—Governu Timor-Leste no Governu Japaun, kinta ne’e, inaugura Sentru Apoiu Kankru Feto iha Fundasaun Alola, Dili.
Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino louva Governu Japaun ne’ebé fó apoiu nafatin ba Timor-Leste liuhusi setór saúde no setór agrikultura.
“Japaun apoia ita iha setór saúde hodi harii ospitál munisípiu 20 iha teritóriu no apoia mós orsamentu ba setór agríkola iha área irrigasaun,” Asanami hateten iha nia diskursu iha lansamentu ba Sentru Apoiu Kankru Feto Haliku.
Nia relata, Sentru Apoiu Kankru Feto haliku nu’udar sentru ba tratamentu ba feto sira-ne’ebé sofre moras kankru.
Iha fatin hanesan, Prezidente Fundasaun Alola, Christy Gusmão, hateten programa haliku iha Fundasaun Alola kria tinan 10 liubá. Ida-ne’e mosu husi nia esperiénsia rasik ho kankru susun nian iha 2013.
“Bainhra ha’u fila hikas mai Timór hafoin halo tratamentu iha Austrália no realiza oinsá priviléjiu sira hetan asesu ba tratamentu ho kualidade di’ak iha nasaun ne’e. No, esperiénsia hetan diagnostiku kankru susun no halo tratamentu ba kankru susun loke hau-nia matan ba realidade situasaun ba feto sira iha Timor Leste,” nia dehan.
Nia dehan, feto barak iha nasaun ne’e kada tinan mate tanba moras ne’ebé to’o agora seidauk bele salva.
“Ne’e kompostu husi feto sira seluk ne’ebé sobrevive kankru, inklui sobrevivente kankru feto sira. Ami-nia misaun prinsipál mak atu hasa’e konxiénsia kona-ba importánsia husi deteksaun lalais kankru nian liuhosi hala’o kampaña ka halo sensibilizasaun ba komunidade. Iha tinan 2016, Haliku sai hanesan parte ida husi programa saúde inan no labarik Fundasaun Alola nian,” nia hateten.
Diretora Ezekutiva Fundasaun Alola, Maria Imaculada Guterres, hateten meta harii sentru ne’e atu apoiu feto maluk sira-ne’ebé hasoru hela dezafiu ho moras kankru.
“Ami fornese kondisaun sira-ne’ebé razoavel no ijiene ne’ebé apoia emosionalmente ba pasiente sira, inklui oferese ambiente ida-ne’ebé inkluzivu,” nia dehan.
Diretór ne’e hatutan, governu Japaun apoia orsamentu $72.000, no Empreza Esperansa Timor Oan (ETO) apoia orsamentu $52.000, nune’e totál kustu konstrusaun hamutuk $124.000.
Jornalista : Felicidade Ximenes
Editór : Cancio Ximenes
