BAUKAU, 04 Setembru 2025 (TATOLI)—Eis Komandante Rejiaun III atuál Prezidente Eleitu Konsellu Munisipál Kombatente Libertasaun Nasionál (CMCLN-sigla portugeza), Cornélio Gama ‘L7’ enkoraja juventude iha Baguia atu buka hatene istória hodi prepara aan di’ak liután iha futuru.
L7 esplika Timor-Leste nu’udár nasaun independente maibé istorikamente prosesu luta ba ukun rasik-aan la’ós fásil tanba timoroan barak lakon vida mezmu to’o ikus hakotu liuhosi votasaun hafoin rezultadu Konsulta Populár fó-sai Timor-Leste manán ho pursentu 78,50.
“Oan sira tenke estuda. Iha futuru imi mak lidera fali rai ne’e,” L7 hateten bainhira sai oradór iha semináriu ne’ebé realiza husi Família Maksalak iha Baguia, Kuarta ne’e.
Notísia relevante: Família Maksalak realiza semináriu komemora loron-04 Setembru iha Baguia
Eis gerrilleiru hato’o mensajen ba juventude liuliu pesoál sira-ne’ebé envolve iha organizasaun arte marsiál no rituál atu kria pás no estabilidade hanesan respeitu inan-aman, líder komunitáriu, kombatente no líder nasaun.
Eis deputadu Parlamentu Nasionál ne’e hatutan bainhira joven sira envolve iha arte marsiál hodi defende soberania nasaun, ida-ne’e pozitivu no evita utiliza hodi halo situasaun seguransa la seguru tanba la kontribui ba pás no estabilidade nasionál.
“Labele tolok líder nasionál sira. Ida-ne’e ami FALINTIL la konkorda,” L7 informa.
Eis Komandante FALINTIL ne’e konta bainhira gerrillia hodi kontra okupasaun Indonézia la sente ta’uk tanba hakarak luta ba ukun-aan liuliu liberta povu husi ki’ak no pobreza.
Nune’e, L7 kontinua enkoraja juventude liuliu iha área Baguia atu kontinua foku ba estuda iha ensinu eskolár para futuru bele kontribui dezenvolve rai moris fatin no nasaun liuhosi serbí instituisaun Estadu sira iha Timor-Leste.
Jornalista: Natalino Belo
Editór: Xisto Freitas da Piedade
