DILI, 04 Setembru 2025 (TATOLI)—Ministériu Interiór (MI) hakarak estabelese tan membru Polísia Nasionál Timor-Leste (PNTL) balun ba Unidade Patrullamentu Fronteira (UPF) atubele reforsa seguransa iha liña fronteira.
Ministru Interiór, Francisco da Costa Guterres sei komunika kestaun ne’e ho Komandu Jerál PNTL hodi define loloos kuantidade membru ne’ebé atu destaka iha liña fronteira.
“Ha’u seidauk temi kada postu ita atu koloka ema na’in-hira iha ne’ebá, tanba ne’e ha’u tenke tuur hamutuk ho Komandu para haree didi’ak ida-ne’e,” Ministru hateten ba Jornalista sira iha nia knaar fatin, Vila-Verde, Kinta ne’e.
Notísia relevante : UPF asegura joven 16 ne’ebé tenta ultrapasa fronteira terrestre
Governante ne’e rekoñese katak, rekursu UPF menus, tanba ne’e presiza aumenta rekursu.
“Ita menus duni rekursu iha ne’ebá, tanba ne’e mak rekrutamentu ida agora ita hanoin oinsá para buka solusaun ba ida-ne’ebá,” nia tenik.
Atu koopera ho autoridade administrativa relevante sira seluk tuir lejizlasaun fiskál, aduaneira no sanitaria. Atu aplika lei sira relasiona ho tráfiku umanu, tráfiku droga ilegál, tráfiku kilat no atividade kriminál organizadu sira seluk.
Aleinde ne’e, Unidade ne’e mós fó seguransa iha Aeroportu hodi hala’o patrulla haleu pista, terminál no aeroportu ho kooperasaun hamutuk ho parte interresada sira seluk no knaar lejítimu sira seluk tuir nia misaun
Membru UPF ativu hamutuk 363, kompostu husi 16 no mane 347.
Jornalista : Natalino Costa
Editora : Julia Chatarina
