AMTL realiza asembleia jerál ba da-VII hodi hadi’a profisionalizmu

DILI, 05 Setembru 2025 (TATOLI)—Asosisaun Médiku Timor Leste (AMTL) realiza asembleia jerál ba da-VII no Simpósiu Nasionál ba-II hodi fó oportunidade ba médiku timoroan sira hamutuk atu partilla esperiénsia no hadi’a profisionalizmu iha área saúde.

Notísia Relevante: AMTL realiza semináriu nasionál kona-ba implementasaun rejime karreira ba profisionál saúde

“Kongresu hanesan plataforma importante atu haree no diskute problema ne’ebé persiste iha sistema saúde Timor-Leste. Ida-ne’e akontese hanesan momentu ida atu buka solusaun prátiku, hodi fó kontribuisaun ba dezenvolvimentu nasionál,” Vise-Ministru ba Operasionalizasaun Ospitál, Flávio Brandão Mendes, hateten ba jornalista sira, iha salaun Katedral, ohin.

Nia felisita AMTL nia loron aniversáriu no agradese ba médiku sira hotu-hotu ne’ebé kontinua servisu ba komunidade, tanba AMTL ne’e harii tinan 26 liu ba kotuk, la’ós de’it asosiasaun profisionál maibé konsidera an hanesan uma mahón ba médiku timoroan sira, kontinua ho vizaun di’ak atu kontribui ba dezenvolvimentu profisionál no hanesan parseiru estratéjiku Ministériu Saúde nian.

“Iha asembleia ne’e fó enfaze ba importánsia atividade akademika no treinamentu atu eleva kapasidade médiku timoroan, maske rai-laran enfrenta limitasaun maibé esforsu akademiku bele ajuda médiku sira atu sai kompetente no adapta ho dezafiu mudansa iha área saúde,” nia esplika.

Brandão dehan, AMTL hanesan instituisaun profisionál fiar katak kolaborasaun no parseria forte ho Ministériu Saúde sei fó resposta di’ak sira-ne’ebé efetivu ba problema no dezafiu ne’ebé mak sistema saúde Timor-Leste enfrenta iha kada loron.

Nune’e, kongresu no simpózium, AMTL sei organiza Asembleia Jerál ida atu hili lideransa foun ba períodu tuir mai. Eleisaun ida-ne’e konsidera importante tanba sei determina diresaun futura asosiasaun nian.

Presidente Asosiasaun Médiku Timor-Leste (AMTL), Rui Maria de Araújo, hateten Asembleia Jerál ba da-VII realiza ho objetivu atu hadi’a diresaun asosiasaun no avalia traballu tinan tolu liu ba kotuk. Asembleia jeral ne’e halo tuir estatutu asosiasaun, ne’ebé determina atu hala’o dala ida kada tinan tolu, hanesan momentu ida atu haree fila-fali vida asosiasaun nian.

“Asembleia ne’e fahe ba sesaun rua, sesaun sentífika no sesaun organizatoriu. Iha sesaun sentífika, médiku sira barak aprezenta peskiza no traballu akademiku sira, atu partilla esperiénsia no hadi’a kualidade profisional,” Rui Araujo dehan.

Nia haktuir, husi tema jeral ba asembleia tinan ida-ne’e mak “Profisionalizmu, responsabilidade no kualidade ba saúde”, entaun tema ne’e importante tebes tanba profisaun saúde iha papel ida-ne’ebé fundamental atu kontribui ba sistema saúde ne’ebé kualidade.

“Ministériu Saúde no Governu iha papel reguladór no disiplinár, entaun AMTL apela atu haree fila-fali ba kestaun Orden Profisional Saúde, inklui Orden Médiku. Instrumentu ne’e sei sai baze forte atu Ministériu Saúde bele servisu hamutuk ho asosiasaun profesinál sira, hodi hametin di’ak liután profisionalizmu no responsabilidade,” nia dehan.

Nia afirma, esforsu koletivu ne’e sei ajuda fó kontribuisaun importante ba kualidade servisu saúde iha Timor-Leste, no sei hadi’a konfiansa públiku ba sistema saúde nasionál.

Jornalista : Felicidade Ximenes

Editór        : Cancio Ximenes