MANUFAHI, 06 Setembru 2025 (TATOLI) – Ministériu Obra Públika (MOP) iha tinan-2025 ne’e implementa ona projetu estrada rurál hamutuk 170 ho montante orsamentu millaun $15 ne’ebé kobre iha territóriu laran no ninia progresu implementasaun daudaun la’o hela no balun besik finaliza.
“Ita atu dehan loloos, katak ita foin mak haka’as-an iha tinan ida ne’e nia laran”, Ministru MOP, Samuel Marçal, informa ba jornalista sira iha Same-Manufahi, ohin.
Notísia relevante: https://tatoli.tl/2025/02/01/autoridade-uatulari-lansa-projetu-reabilitasaun-estrada-rural-husi-nunumlau-ba-iraler/
Governante ne’e dehan, ba tinan oin nafatin tau orsamentu hodi responde prioridade emerjénsia iha área rurál sira tanba bainhira tempu udan ameasa risku ba komunidade.
Aleinde ne’e, Nia relata, kona-ba estrada urbana ne’ebé daudaun ne’e Governu implementa ona maka iha munisípiu Dili no Maliana-Bobonaru.
Ba iha tinan oin sei kontinua implementa iha munisípiu Aileu, Ermera (Glenu), Likisá, Vikeke, Lautein (Lospalos) no Baukau, tanba kuaze ninia orsamentu tau ona iha Orsamentu Jerál Estadu (OJE) 2025.
Iha OJE 2025 MOP prevee $270,757, 350 aloka ba saláriu no vensimentu $9,182, 148, bens no serbisu $19, 032, 404, transferénsia públika $176, 500,000, kapitál dezenvolvimentu $66, 042,798.
Notísia relevante: https://tatoli.tl/2024/10/23/mop-kontinua-implementa-projetu-infraestrutura-700-resin-iha-2025/
Jornalista: Alexandra da Costa
Editór: Rafael Ximenes de A. Belo
