BOBONARU, 08 Setembru 2025 (TATOLI) – Negosiante no komunidade preokupa ho kondisaun merkadu sentrál postu administrativu Bobonaru, munisípiu Bobonaru, tanba espasu ne’ebé kloot no iha atividade fa’an sempre difikulta movimentasaun transporte.
Jaime de Jesus Pires, komunidade Bobonaru, husu Autoridade Munisípiu Bobonaru atu tau orsamentu iha Planu Dezenvolvimentu Integradu Munisipál (PDIM) 2027 hodi hadi’k merkadu no tulun negosiante sira halo atividade komersiál ho seguru.
“Loron sábadu bazár ne’e motor ho karreta liu bá-mai la di’ak, tanba ita nia negosiante sira fa’an fali sasan iha estrada klaran. Dalaruma karreta obriga liu sama sala sasán ruma, entaun sira hakilar malu, hirus-malu to’o atu baku malu tan. Ne’e ita atu fó sala ba sé? Tanba sira halo hanesan ne’e tanba nesesidade, entaun ita-nia Governu persiza tau atensaun, tanba problema ne’e kle’ur ona, la’ós foin akontese”, nia lamenta.
Preokupasaun ne’e autoridade postu no xefe suku sira hato’o beibeik ona iha reuniaun Konsellu Koordenasaun Munisipál (CCM), maibé to’o agora laiha rezultadu.
“Merkadu ida-ne’e sai sentru hodi akumula negosiante sira husi suku 18. Iha sábadu sira mai halo atividade iha ne’e. Ami sujere buka meiu oinsa para rezolve lalais”, nia dehan.
Negosiante Rita Marques sente la seguru halo atividade fa’an iha merkadu ne’e, tanba fatin laiha. “Ami bá kotuk mós la di’ak, entaun hakarak ka lakohi ami mai rabat estrada, nahe terpál mak fa’an”, nia realsa.
Aleinde ne’e, kondisaun infraestrutura bazika merkadu atuál mós grave, tanba aliserse uma kle’uk no nakfera hotu ona. “Sira parte leten ne’e sábadu-sábadu fa’an hotu sai mai, tau sasán iha estrada ninin. Ema lakohi tama bá sosa tanba ta’uk uma ne’e monu”, nia relata.
Aleinde kondisaun merkadu, Rita mós preukupa tanba laiha saneamentu báziku. “Bee-moos laiha, sintina mós laiha. Imajina ema husi suku 18 mai hotu iha ne’e, balun obrigatóriu bá husu ema nia hariis-fatin. Dalaruma ema fó no la fó tama”, nia hato’o.
Tuir observasaun jornalista Tatoli, kada loron Komando Polisía Eskuadra Bobonaru Vila koloka membru sira iha terrenu hodi organiza movimentasaun transporte atu evita engrrafamentu no asidente tráfegu.
Merkadu ne’e Governu sentrál halo reabilitasaun iha tinan 2004, no iha 2019, hetan estragu tanba kauza husi erozaun hafoin akontese udan boot.
Rekorde katak Autoridade Munisípiu Bobonaru, liuhusi reuniaun CCM seidauk tau prioridade atu konstrui merkadu foun, tanba fatin atuál laiha espasu sufisiente atu akumula ema ho transporte no presiza buka fatin foun.
Jornalista: Sergio da Cruz
Editora: Maria Auxiliadora
