DILI, 08 Setembru 2025 (TATOLI) — Papa Leão XIV kanoniza ofisialmente Carlo Acutis, joven italianu, nu’udar santu mileniál dahuluk, hamutuk ho Pier Giorgio Frassati liu husi misa kanonizasaun iha Domingu (07/09), iha Vatikanu.
Tuir Vatican News, misa kanonizasaun ne’ebé prezide husi Papa Leão XIV iha Prasa São Pedro ne’e partisipa husi sarani liu rihun 80 ne’ebé asiste momentu istóriku ida iha Igreja Katólika.
Iha ninia omília, Amu Papa fó hanoin kona-ba santu foinsa’e na’in-rua ne’e nia ezemplu ne’ebé konvida ema hotu, liuliu joven sira, atu dirije sira-nia moris ba Maromak no halo sira sai “obra-prima santidade, servisu no ksolok nian”.
“Santu sira bolu ita atu hateke ba Maromak, atu kria obra-prima sira iha ita-nia moris”, Papa hateten.
Nia subliña katak sira-nia sasin mak bolun ida ba jerasaun hotu atu moris iha fiar, esperansa, no fiar iha Maromak nia planu boot.
Líder Igreja Katólika ne’e hateten importánsia atu saran nia moris tomak ba Maromak, hodi sita pasajen evanjellu nian ne’ebé fó hanoin atu tuir Maromak nia planu ho laran tomak.
Ba foinsa’e sira, Amu Papa hateten, dala barak hasoru kruzamentu no desizaun difísil sira. Hodi foti ezemplu Saun Francisco Assis nian, sira hetan konvite atu abandona mundu hodi tuir Maromak, hodi fó prioridade ba domin ba ema seluk, liuliu sira ne’ebé fraku no ki’ik liu.
“Santu barak tebes iha istória tomak oferese sira-nia an ba Maromak, maski nu’udar joven, hodi fó sira-nia an kompletamente lahó rai buat ida ba sira-nia an rasik”, Amu Papa kontinua.
Carlo Acutis moris iha loron 03 fulan-Maiu tinan 1991, iha Londres, Inglaterra, husi Andrea Acutis no Antónia Salzano. Ninia família muda ba Milaun, Itália, iha Setembru 1991.
Amu Papa Leão XIV destaka oinsá Carlo hetan Jezús liuhusi ninia família no komunidade, no buras iha ninia fiar liuhusi eskola no sakramentu sira-ninia parókia nian.
“Nia boot hodi integra orasaun, desportu, estudu, no karidade iha nia moris nu’udar labarik no joven”, Papa hateten.
Carlo Acutis hakotu iis iha loron 12 fulan-Outubru tinan 2006, tanba sofre leusemia promielosítika aguda ho tinan 15. Liuhusi orasaun loroloron, adorasaun eukarístika, no hahalok simples karidade nian, Carlo haburas domin ba Maromak no ba maluk. Dalabarak nia dehan, “lalehan sempre hein ita, no hadomi aban signifika fó ita-nia fuan sira ne’ebé di’ak liu ohin.”
Amu Papa Leão XIV remata ninia omília hodi husu ba ema hotu, liuliu foinsa’e sira, atu labele estraga sira-nia moris, maibé dirije sira ba leten no halo sira sai obra-prima.
“Sira enkoraja ita ho sira-nia liafuan: ‘La’ós ha’u, maibé Maromak,’ hanesan uluk Carlo dehan”, Amu Papa relata. Fórmula simples ida-ne’e reflete santidade no ezemplu atu banati tuir atu ema hotu bele goza moris ho nakonu no hasoru Maromak iha bankete lalehan nian.
Prosesu kanonizasaun Carlo Acutis nian hahú bainhira hetan deklarasaun nu’udar “Maromak nia Atan” iha loron 12 Outubru tinan 2012, iha Arkidioseze Milaun nian. Papa Francisco konfirma nia moris eróiku virtude nian iha loron 05 fulan-Jullu tinan 2018, hodi deklara nia “Veneravel”.
Beatifikasaun ba Carlo Acutis akontese iha loron 10 fulan-Outubru tinan 2020, iha Assisi, hafoin Vatikanu rekoñese milagre kura ba labarik ida iha Brazíl. Milagre daruak ne’ebé lori ba kanonizasaun akontese iha tinan 2022, bainhira Valeria Valverde, feto husi Kosta Rika ida, rekupera husi emorarjia grave iha kakutak hafoin nia inan reza ba Carlo nia intersesaun.
Carlo Acutis koñesidu nu’udar “Padroeiru Internét nian” ka “Maromak nia Influensiadór”, tanba uza teknolojia dijitál hodi habelar hanorin Katóliku sira.
Nia hanorin nia-an rasik programasaun no dezeñu web, kria website ida ne’ebé dokumenta milagre eukarístiku sira no aparisaun Maria sira iha 2004, ne’ebé sai hanesan instrumentu ida ba instrusaun relijioza iha mundu tomak.
Dadaun ne’e Santu Carlo Acutis hakoi iha Igreja Santa Maria Maggiore iha Assisi, Itália, no nia mate-isin rai iha kaixaun ho vidru, taka ho lilin hodi fó onra ba nia santidade nu’udar santu iha Igreja Katólika. Nia sai santu mileniál dahuluk, no nia rate atrai peregrinu rihun ba rihun ne’ebé reza ba nia intersesaun.
Carlo Acutis oras ne’e hamriik nu’udar modelu ba foinsa’e sira, hodi hanorin katak fiar, teknolojia, no kriatividade bele hamutuk hodi habelar Maromak nia domin no laran-di’ak iha era modernu.
Notísia relevante: Papa Leão XIV sei kanoniza Carlo Acutis no Beatu nain ualu iha tinan ne’e
Jornalista: Cidalia Fátima
Editora: Maria Auxiliadora
