DILI, 08 Setembru 2025 (TATOLI)—Diretór Ezekutivu Arkivu Muzeu Rezisténsia Timorense (AMRT), Jorge Alves “We Moris” informa konstrusaun Jardín Chama Eterna iha progresu (atinje ona pursentu 60).
“Projetu Chama Eterna nia progresu konstrusaun atinje ona 60% no hein katak antes tinan ne’e nia rohan bele finaliza ona tanba hela jardín no ida-ne’e presiza mós halo nia espozisaun,” nia dehan ba TATOLI iha nia knaar fatin, Kolmera, Dili, Segunda ne’e.
We Moris dehan empreza ba obra ne’e mós esforsu hodi oinsá bele finaliza tuir tempu ne’ebé determinadu.
Konstrusaun durante fulan 30 hahú hosi fulan-Fevereiru 2023 to’o Setembru 2025 no hala’o hosi empreza Starking no MDF Acesso iha Joint Venture no supervizaun mak responsabiliza husi Consorcio Soares no Guterres.
Notísia relevante: Konstrusaun Jardín Chama Eterna falta uma-kakuluk no jardín
Medida rai ba konstrusaun ne’e purvolta metru rihun 2-resin kuadradu ho kustu orsamentu ba konstrusaun fízika $4.000.000-resin, inklui kustu ba unidade projetu jestaun no kustu ba supervizaun $5.000.000-resin.
Jerente Konstrusaun Starking, Jovencio Rosário hateten einjerál nia progresu konstrusaun ba obra ne’e atinje ona 60%. Hosi pursentu ne’e maihosi konsege hamaran bee iha planta konstrusaun, instalasaun eletrisidade, kestaun mekánika no arkitetura.
“Projetu ida-ne’e tinan ne’e seidauk bele konklui tuir planu implementasaun ba obra ne’e iha Fevereiru tinan oin,” nia dehan.
Jornalista: Osória Marques
Editór: Xisto Freitas da Piedade
