Selebrasaun misa tinan ida Papa vizita TL, SNAEM apoiu ambulánsia tolu

Fé no devosaun ne’ebé timoroan sira iha ba fiar Katólika. Iha vizita Sua Santidade nian, sarani sira kaer no lori Relikia hodi hatudu sira-nia vertude nu’udar fiar-na’in maske loron manas, distánsia no kolen, hodi ba partisipa misa solene ne’ebé preside direta husi Amu Papa, nu’udar saseluk Kristu nian iha mundu. Imajen TATOLI/Francisco Sony

DILI, 08 Setembru 2025 (TATOLI)—Diretór Jerál Servisu Nasionál Ambulánsia Emerjénsia Médika (SNAEM), Simplicio Amaral, hateten sei apoiu ambulánsia tolu (3) no monta Postu Médiku haat (4) iha Tasi-Tolu hodi atende sarani sira-ne’ebé partisipa selebrasaun misa tinan ida Papa Francisco vizita Timor-Leste, iha 10 Setembru 2025.

Notísia Relevante: Igreja kontinua prepara misa selebrasaun aniversária vizita Papa Francisco iha TL

“Servisu Ambulánsia no Emerjénsa Médika durante ne’e, ita komunika-malu ho igreja katólika ho Konsellu Nasionál Juventude Timor-Leste, ita-nia ekipa emerjénsia horisehik ha’u koordena sira atu halo preparasaun liuliu instalasaun ba tenda médiku iha Tasi-Tolu. Ohin dadeer, ha’u konfirma fali Xefe Emerjénsia iha ne’e katak aban ekipa SNAEM ba instala ona tenda Médiku iha Tasi-Tolu hamutuk haat (4), bainaka husi estranjeiru la-mai, ita mesak timoroan de’it mak sei selebra misa ida-ne’e,” Simplicio hateten ba jornalista sira iha edifisiu SNAEM, Kaikoli, ohin.

Nia dehan, ambulánsia tolu ne’ebé SNAEM prepara ona ida (1) ba (Very Important Person) VIP no rua (2) ba sidadaun baibain ne’ebé partisipa misa sofre moras, ambulánsia bele apoiu kedan hodi evakua ba Ospitál no Postu Saúde ne’ebé besik.

“Ita mós sei koordena nafatin ho instituisaun sira seluk hanesan iha Ministériu Saúde, Servisu Saúde Munisípiu Dili hodi nune’e atende ita-nia sarani sira, tanba sarani sira mai barak,” nia dehan.

Nia hatutan, iha Postu Saúde haat (4) ne’ebé instala iha Tasi-Tolu besik fatin misa sei koloka Médiku na’in-rua (2), Enfermeiru na’in-haat (4), Kondutór na’in-ida (1) inklui ho Parteira na’in-ida (1) hodi atende inan isin-rua balun ne’ebé partisipa misa mosu problema Saúde bele atende.

Tuir nia, kona-ba ekipamentu báziku atu halo tratmentu iha Postu Saúde haat (4) ne’ebé sei estabelese iha Tasi-Tolu besik fatin misa sufisiente hodi atende sarani sira bainhira sofre moras ruma iha fatin referidu.

Antes ne’e, iha 09 Setembru 2024, Timor-Leste simu Vizita Apostólika Sua Santidade Papa Francisco. Vizita istórika ida-ne’e, parte husi Viajen Apostólika ba Ázia, sai ona momentu ida-ne’ebé ho bensaun no importánsia boot ida ba timoroan hotu.

Jornalista : Felicidade Ximenes

Editór : Cancio Ximenes