DILI, 08 Setembru 2025 (TATOLI)—Ekipa Selesaun Nasionál Futeból Timor-Leste U-23 retira aan husi kualifikasaun Asian Football Confederation (AFC-sigla ingleza) U-23 ne’ebé hala’o iha Xina.
Ekipa Lafaek husik hela eventu kompetisaun rejionál ne’e hafoin iha jogu kualifikaaaun daruak derrota tan kontra Austrália ho rezultadu ikus 0-6.
Ekipa Kanguru hatudu dominasaun iha jogu kontra Timor-Leste bainhira iha primeira volta rezulta 3-0 no segundu volta aumenta tan golu tolu hodi lori Austrália lidera tabela klasifikasaun.
Antes ne’e, kapitaun ekipa Gali Freitas ho kolega derrota uluk kontra uma-na’in Xina ho skor mihis 2-1 ne’ebé hala’o iha loron-03 Setembru iha Estádiu Xi’an Internasionál Football Center, Tiongkok.
Golu husi ekipa Tiongkok prodús husi jogadór Baihelamu iha minutu 42 no Wang Yudong antes parte dahuluk ramata, enkuantu Timor-Leste konsege hamihis golu liuhosi jogadór Gali Freitas iha minutu-53.
Notísia relevante: FFTL deside treinadór lokál na’in-haat provizoriamente lidera Selesaun Nasionál U-23
Mezmu ekipa Timor-Leste sei falta jogu ikus kontra Illa Mariana maibé rezultadu jogu referidu sei la fó impaktu ba tabela klasifikasaun nune’e obrigadu tenke retira husi kompetisaun AFC qualifiers.
Husi jogu rua ne’e, provizoriamente Selesaun Nasionál Timor-Leste laiha pontu (P) ka zero (0) iha tabela klasifikasaun, entretantu ekipa Austrália lidera grupu D ho pontu 6, tuir kedas Xina ho pontu 6, Illa Mariana iha pozisaun ikus ho pontu 0.
Jornalista: Natalino Belo
Editór: Xisto Freitas da Piedade
