OEKUSI, 09 Setembru 2025 (TATOLI) – Diresaun Rejionál Agrikultura, Rejiaun Administrativa Espesiál Oekusi Ambeno (RAEOA), hatuur fatuk-inan hodi konstrui projetu perfurasaun sistema bee-moos atu kanaliza ba iha sentru produsaun animál, ne’ebé lokaliza iha bairru Boko Hauboni suku Taiboko sub-rejiaun Pante Makasar.
Notísia relevante:Agrikultura Oekusi implementa projetu perfurasaun bee-moos iha Usitasa’e no Taiboko
Iha ámbitu lansamentu ne’e, Diretór Diresaun Rejionál Agrikultura Oekusi, José Oki, esplika, objetivu husi perfurasaun sistema bee-moos ne’e atu fasilita animál sira, tanba ne’e, nia husu ba kompañia konstrutora presiza aselera garante kualidade no kumpre Bill of Quantity (BoQ) – livru enkargu ka montante orsamentu, ne’ebé prevista iha dokumentu kontratu.
“Projetu ne’e, autoridade anteriór mak halo konkursu públiku, ne’ebé ami mai kontinua de’it saida mak uluk inísia ona. Entaun, importante garantia bee ne’e tenke estavel, serbisu presiza tuir nia BoQ. Se la’e, ita fura tiha lakle’ur bee maran fali, kuandu bee ne’e maran signifika ita halo serbisu ne’e la fó solusaun ba ita-nia problema, agora mós besik udan monu rai, entaun kompañia tenke haka’as aan atu konklui antes udan, nune’e bele utiliza ba sentru ne’e,” nia hato’o iha diskursu lansamentu, iha sentru produsaun animál iha bairru Bokos.
Dirijente Agrikultura ne’e esplika katak, mandatu autoridade atuál, tempu tranzitóriu de’it, tan ne’e kompañia presiza aselera lalais, bainhira nia progresu serbisu atinje ona pursentu 50, kompañia iha obrigasaun submete pedidu pagamentu, maibé ekipa tékniku mai tuun mai terrenu hodi halo fiskalizasaun.
Iha biban ne’e, Diretór Kompañia Tua Colen Unipesoál.Lda. Jimmy Frantianu da Cruz, agradese ba serbisu agrikultura RAEOA, tanba bele fó fiar ba kompañia Tua Cole. Tan ne’e, nia kompromete sei aselera tuir rekomendasaun no BoQ ne’ebé iha ona.
“Rekomendasaun ohin ne’e, ami sei kumpre tuir kbiiit ne’ebé kompañia iha, maibé ami sei esforsa, tanba ne’e gasta osan Estadu, entaun nia benefísiu tenke balansu ho valór ne’ebé Governu atribui mai kompañia atu halo konstrusaun ne’e,” nia promete.
Notísia relevante:Agrikultura Oé-Cusse aloka $43-resin harii klínika ba animál iha Taiboko
Entretantu, kompañia Tua Cole Unipesoál Lda, ezekuta projetu perfurasaun sistema bee-moos ne’e ho valór orsamentu rihun $47,781.66.
Jornalista: Abílio Elo Nini
Editór: Rafael Ximenes de A. Belo
