OEKUSI, 06 Agostu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA),liuhusi Sekretária Rejionál ba Asuntu Agrikultura, aloka osan rihun $76,351. 96, husi Orsamentu Jerál Estadu (OJE) 2025 nian ba projetu perfurasaun bee-moos ba grupu ortikultura sira iha Noepapa suku Usitasa’e sub-rejiaun Oésilo no sentru produsaun animál iha suku Taiboko sub-rejiaun Pante Makasar.
“Polítika Sekretária Rejionál Agrikultura halo ona perfurasaun bee-moos iha fatin rua, ida iha suku Taiboko atu fornese ba sentru produsaun animál nian, no ida iha Noepapa suku Usitasa’e atu kanaliza bee-moos ba grupu ortikultura sira,” Diretór Diresaun Rejionál Agrikultura Oekusi, Amaro Efi informa ba Ajénsia TATOLI iha Oekusi, ohin.
Nia esplika, projetu rua ne’e mak hanesan perfurasaun bee-moos iha sentru produsaun animál Maquelab ezekuta husi kompañia lokál Tua Cole Unipesoál Lda ho valór kontratu rihun $47,781.66, no projetu perfurasaun iha Noepapa suku Usitasa’e ezekuta husi empreza lokál Abi Haemjam Unipesoál Lda ho valór kontratu rihun $28,570.30.
“Ita espera kompañia sira, bele aselera lalais projetu referida, nune’e komunidade sira bele utíliza ona,” nia dehan.
Notísia relevante:Agrikultura Oekusi-parseriu sira diskute prioridade hasa’e produsaun agríkola
Xefe suku Usitasa’e, Tomas Ulan Colo, senti orgullu tanba durante tinan barak grupu ortikultura sira iha área Noepapa enfrenta problema bee maibé hafoin submete pedidu ba Autoridade RAEOA no hetan duni rezultadu.
Nia esplika, grupu ortikultura ne’e, nia área kultivasaun ne’e, iha ektare rua, maioria kuda modo ho tipu oi-oin hanesan lis, inklui produtu lokál seluk-tan, tanba to’os modo ne’e iha ektre hitu.
“Projetu perfurasaun ne’e, agora hetan ona bee-moos, maibé kompañia seidauk halo kanalizasaun ba to’o modo sira, ne’ebé maske serbisu sei la’o hela, maibé ita agradese tanba antes ita-nia grupu sira infrenta problema bee, dalaruma uza bee-mota maibé tenki la’o do’ok, tan ne’e tinan kotuk ita hato’o proposta ba agrikultura, no tinan apoia ona, ne’ebé ita espera katak, projetu ne’e sei finaliza antes udan monu rai, atu fasilita grupu sira,” nia orghullu.
Notísia relevante: https://tatoli.tl/2024/10/15/lao-hamutuk-husu-governu-kapasita-agrikultor-sira-hasae-produsaun-agrikola/
Jornalista: Abílio Elo Nini
Editór: Rafael Ximenes de A. Belo
