OEKUSI, 10 Abríl 2025 (TATOLI)– Diresaun Rejionál Agrikultura, Rejiaun Administrativa Espesiál Oekusi Ambeno (RAEOA), realiza enkontru ho parseriu dezenvolvimentu sira mai husi Organizasaun Naun Governamentál (ONG) lokál, nasionál no internasionál atu avalia programa servisu iha trimestre dahuluk nian hahú Janeiru to’o Marsu, ne’ebé sai prioridade atu hadi’a no fó solusaun iha futuru.
Programa lima ne’ebé parseriu sira ho Diresaun Rejionál Agrikultura halo diskusaun mak impaktu produsaun alimentasaun, kolleta udan-been, jestaun ba bee-moos, konservasaun ba bee-matan sira no inundasaun no erosaun liga ho tempu-udan.
Notísia relevante:Agrikultura Oekusi observa ai-kameli rihun 2-resin ne’ebé kuda iha Suni-Ufe
“Enkontru ohin ne’e, ami foku liu ba atividade lima, oinsá hasa’e produsaun agríkola nian iha territóriu Oekusi, nune’e mós oinsá kolleta udan-been, jestaun utilizasaun bee-moos. Ami nia diskusaun mós kona-ba área konservasaun bee-matan sira, rai ne’ebé hamosu erosaun, atu oinsá agrikultura hamutuk ho parseriu sira bele halo atuasaun,” Diretór Diresaun Rejionál Agrikultura, Amaro Efi, hatete hafoin enkontru ne’e iha Oekusi.
Nia hatutan: “Ida-ne’e mak ohin ami tau idea hamutuk, nune’e trimestre tuir mai ami tenke hadi’a tanba agora tempu udan presiza hamutuk ho parseriu sira atu levanta problema sira atu diskute hodi fó solusaun ba futuru”.
Iha fatin hanesan, Koordenadór PERMATIL Oekusi, Arnold Suni, konsidera enkontru koordenasaun importante atu aprezenta problema no dezafiu, nune’e bele hadi’a iha futuru.
Daudaun, PERMATIL halo ona konservasaun ba udan-been iha suku 18, no konsege hamoris bee-matan balun, atu fornese ba komunidade sira.
“Sorumutuk ohin importante atu hatudu katak servisu atu lori povu ba moris di’ak, ita hotu tenke koopera servisu hamutuk sosiedade sivíl no entidade hotu presiza hamutuk tanba ema balun servisu iha parte oi-oin, maibé liuhusi kooperasaun itabele tau hanoin hamutuk ba moris di’ak, exemplu ami PERMATIL foku oinsa kolleta bee atu fó moris ba bee-matan sira, ida-ne’e mak ohin hamutuk ho objetivu ida atu fó moris ba ema hotu,” nia afirma.
Parseriu ne’ebé hala’o enkontru mak hanesan, Permakultura Timor-Leste (PERMATIL), Binibu Faef Nome (BIFANO), OXFAM, World Neighbors (WN), World Food Programme (WFP), Fundasaun Esperansa Oekusi (FEEO) no Sentru Edukasaun Sívika Enklave Oekusi (CECEO).
Notísia relevante:Dirasaun Agrikultura prepara ai-oan rihun 50 kuda iha área protejida
Jornalista: Abílio Elo Nini
Editór: Florencio Miranda Ximenes
