Autoridade apoia viatura ida serbí operasaun ba Sentru Saúde Kiumaonteko
OEKUSI, 23 Outubru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhosi Diresaun Servisu Rejionál Saúde, apoia viátura ida ho númeru xapa mátrikula 06.009G, ba Sentru Saúde Kiumaonteko, neʼebé lokaliza iha aldeia Sanane, suku Costa, sub-rejiaun Pante-Makasar, hodi apoia servisu operasaun nian.
Diretora Servisu Rejionál Saúde Oekusi, Odete Amado Martins, informa, atribuisaun transporte neʼe nuʼudar solusaun urjente hodi apoiu pesoál saúde sira, atu hakbesik atendimentu ba komunidade, liliu área rurál no izoladu.
Dirijente Saúde ne’e, afirma, katak, veíkulu ne’e serbí ba operasionál, hodi apoia atividade iha dadus primária nian, tanba haree área kobertura iha Sentru Saúde Kiumaonteko luan, kobre populasaun rihun 29 barakliu iha sentru saude sira iha Oekusi.
“Husi sentru saúde lima iha Oekusi, sentru saúde haat mak iha hotu ona karreta operasionál, maibé Kiumaonteko mak seidauk iha. Tan neʼe ita ho hanoin katak kada sentru saúde presiza iha karreta operasionál hodi apoiu atividade neʼebé planeia ona iha tinan kotuk, nune’e diresaun foti desizaun hodi atribui transporte, hodi bele jere rasik ba atendimentu iha baze,ˮ nia hateten iha salaun Sentru Saúde Kiumaonteko, sesta ne’e.
Direjente Saúde ne’e, espera katak, ho fasilidade ne’e, presiza jere ho responsabilidade hodi uza bazeia ba regra no nesesidade servisu nian.
“Propriedade Estadu nian tenke asegura hodi uza ba tempu naruk, no husu partikulár ba motorista sira atu konduz ho kuidadu no kumpre regra sira, nuneʼe bele fasilita nafatin servisu hotu ba atendimentu komunidade iha baze,” nia apela.
Iha biban ne’e, Xefe Sentru Saúde Kiumaonteko, Anita Maria da Cunha, orgullu tanba ho veíkulu operasionál ne’ebé simu, sei apoiu tebes servisu sira iha komunidade, hanesan atividade SISCA, PIS, Sweeping, vásina no vizita domisiliáriu.
“Husi karreta neʼe nia prezensa, ami sei esforsu hodi atinje servisu neʼebé durante tinan barak la konsege kobre, no sei esforsu hodi bele lori saúde neʼe toʼo iha komunidade liliu sira-neʼebé hela iha área rurál,” Anita Maria da Cunha dehan.
Nia relembra fali katak, antes neʼe Sentru Saúde Kiumaonteko utiliza deʼit karreta multifunsaun ka ambulánsia neʼebé tuir loloos atende deʼit servisu emerjénsia nian, tanba neʼe mak la konsege atinje servisu balun.
“Maibé agora diʼak ona tanba ohin iha ona karreta ida hodi apoiu pesoál saúde sira atu bele mellora liután servisu hodi kobre suku neen no aldeia 14 ho fasil. Sentru saúde neʼe kobre mós suku sira-neʼebé ho distánsia dook tebes hanesan suku Monemeko, Kutete no suku Nípani,” nia hateten.
Nia mós hatoʼo agradesimentu waʼin ba diresaun Saúde Rejionál no kompromete sei uza deʼit veíkulu neʼe ba servisu saúde, kuidadu hanesan propriedade rasik, no halo manutensaun tuir tempu.
Atualmente, sentru saúde referida iha pesoál saúde hamutuk naʼin-35, no se hamutuk ho postu saúde FTS sira, totál hamutuk naʼin-66.
Jornalista: Abílio Elo Nini
Editór: Rafael Ximenes de A. Belo
