Dirijente Edukasaun avalia prosesu letivu agrupamentu EBC Boboloa iha Pante Makasar

OEKUSI, 27 Outubru 2026 (TATOLI) –  Diretór Servisu Rejionál Edukasaun, Rejiaun Administrativa Espesiál Oekusi Ambeno (RAEOA), Vincêncio Cono, tersa ohin, realiza enkontru servisu ho dirijente no profesór sira iha agrupamentu Ensinu Báziku Sentrál (EBC, sigla portugés) 3º Siklu Boboloa, iha suku Bobokase sub-rejiaun Pante Makasar hodi avalia prosesu letivu no progresu servisu edukasaun nian iha baze.

Iha biban ne’e, Diretór Diresaun Servisu Edukasaun Oekusi, Vincêncio Cono, afirma katak, kualifika profesór sira-nia kna’ar nu’udar fundamentu boot ida ba dezenvolvimentu sosiál no edukasionál iha rejiaun ne’e.

Tanba ne’e, dirijente edukasaun Oekusi ne’e, enfatiza katak profisaun edukadór nian la’ós de’it misaun baibain, maibé nu’udar vokasaun kle’an ida hodi hala’o kna’ar no responsabilidade ho laran-metin.

“Husi ne’e, ha’u husu ba edukadór sira hotu atu hatudu domin no dedikasaun boot profisaun, tanba mudansa kualidade edukasaun mehi-husi liman profesór sira nian,” nia hateten iha salaun EBC Boboloa, ohin.

Diretór Cono reforsa tan katak, importánsia husi disiplina no kumprimentu oráriu servisu nian hodi garante kualidade edukasaun ne’ebé di’akliu iha Oekusi no Timor-Leste tomak.

Aleinde halo avaliasaun, Diretór Rejionál ne’e apela ba manorin sira atu hahú prepara-an partisipa iha selebrasaun fulan edukasaun tuir kaléndariu sei realiza iha territóriu RAEOA ne’ebé akontese loron 12 Novembru 2026.

Tanba selebrasaun ne’e sei sentraliza iha Salaun Konvensaun Alfándega Um de Maiuo, Palaban, ho atividade oioin hodi hametin espíiritu kompetitivu no kapasitasaun estudante sira-nian,  liuhusi kompetisaun sertame ba nível Ensinu Báziku no diskursu públiku ba estudante Ensinu Sekundáriu sira.

Notísia relevante:Manorin-na’in éroi títulu laek

Iha fatin hanesan, Diretór Agrupamentu EBC Boboloa, Raimundo João Paulo, ho ekipa hato’o ninia kompromisu no kumpre hala’o profisaun ho  responsabilidade.

“Ami hato’o agradese tanba ohin bele mai vizita ami iha fatin ne’e, mensajen no orientasaun sira ohin ne’ebé ami simu, prontu no foti pasu sira hodi mellora kualidade prosesu mehi no aprendizajen iha agrupamentu ne’e, atu lori impaktu pozitivu ba edukasaun nasionál,” nia orgullu.

Entretantu, Agrupamentu EBC 3º Siklu Boboloa kobre Ensinu Báziku Filiál (EBF) lima, kompostu husi EBF Euna’e, EBF 1.2.3 Mekobeno Quinat, EBF Lalehan, EBF Nun-Ana, no EBF Afoneno.

Jornalista: Abílio Elo Nini

Editór: Rafael Ximenes de A. Belo