MESSK hahú rejista estudante iha Oekusi asesu bolsa rejime espesiál no jerál

OEKUSI, 26 Outubru 2026 (TATOLI) –  Ministériu Ensinu Superiór Siénsia no Kultura (MESSK), segunda ohin, hahú halo ona rejistrasaun ba estudante sira iha Rejiaun Administrativa Espesiál Oekusi Ambeno (RAEOA), atu konkorre iha bolsa rejime espesiál no rejime jerál hodi asesu ba Universidade Timor-Lorosa’e (UNTL) no Institutu Politéknika Timor-Leste (IPTL), eskola CAFE iha munisípiu Ermera no eskola otelária turizmu iha munisípiu Lautein.

Koordenadór Ekipa Inskrisaun husi MESSK, Candido Belo Dos Reis, informa, atividade rejistrasaun ne’e realiza kada tinan, tanba ohin hahú rejista ba rejime espesiál no rejime jerál. Rejime espesiál alvu ba estudante sira-ne’ebé ramata ona ensinu sekundáriu iha tinan-2022 to’o 2025, ba rejime jerál alvu ba estudante finalista 2026 nian.

Aliende ne’e mós iha rejistrasaun ba rejime oportunidade, hakbiit kabe ba inan-aman sira-ne’ebé kbiit-laek no sei hetan mós deklarasaun ofisiál husi autoridade komunitária no servisu sosiál Oekusi no la presiza valór determinasaun, fillu veteranu no rejime maior 23.

“Rejistrasaun ne’e bazeia ba rekezitu estudante, ohin ita hahú sei remata iha loron sesta semana ne’e, depois to’o fali Dezembru mak halo ezame intervista,” nia hateten iha salaun INFORDEPE Oekusi, ohin.

Nia esplika, prosesu rejistrasaun durante semana ida, laiha limitasaun ka númeru estudante maibé depende fali ba estudante sira atu partisipa, ho nia rekezitu sei haree fali ba valór estudante nian, ezemplu estudante ida atu hili língua portugés, nia valór mínimu tenke 6,0 no diploma sekundária tenke legalizadu, faze tuir mai partisipa iha intervistrasaun.

Notísia relevante:MESSK rejista estudante 173 asesu ba rejime espesiál UNTL no IPB

Iha biban ne’e, Koordenadór MESSK destakadu iha RAEOA, Arnaldo Gomes Lopes Oqui Neno, agradese tanba bele fó oportunidade tebes ba Oekusi-oan.

“Iha fulan kotuk ministériu mai halo ona desiminasaun ba xefe suku 20 iha Oekusi no jestór sub-rejiaun sira, autoridade seguránsa, no entidade relevante sira seluk, atu oinsa aproveita oportunidade ne’e. Tanba bazeia ba kada tinan ita garante tebes, atu asesu ida-ne’e, iha tinan kotuk konsege estudante 160 maka pasa hodi asesu ba ensinu superiór sira ne’e,” nia hateten

Notísia relevante:Prosesu verifikasaun dadus profesór rejime espesiál faze daruak remata  

Jornalista: Abílio Elo Nini

Editór: Rafael Ximenes de A. Belo