DILI, 08 janeiru 2024 (TATOLI) – Diresaun Nasionál Rekursu Umanu iha Ministériu Edukasaun (ME) finaliza ona verifikasaun dadus profesór rejime espesiál faze daruak hamutuk 600.
“Tuir dadus husi komisaun, konsege hetan ona profesór hamutuk 600, maibé tanbaiha falla uitoan husi sistema, entaun sei iha profesór hamutuk na’in-20 nia dadus maka seidauk tama iha sistema. Tanba ne’e, ita sei prosesa hela, maibé atu ko’alia loloos prosesu hotu finaliza ona”, Diretora Nasionál Rekursu Umanu, Anita Tavares de Jesus, hatete ba Tatoli, iha Ministériu Edukasaun,Vila Verde, ohin.
Nia esplika katak manorin 20 ne’ebé ninia dadus sei prosesa hela ne’e tanba Komisaun Funsaun Públika iha sistema rua, tuan no foun. “Buat rua ne’e maka lahan malu tanba presiza atualiza husi sistema tuan ba foun, nune’e maka iha falla uitoan hodi trava hela dadus profesór 20 nian”, katak.
Komisaun serbisu hamutuk ho Ministériu Edukasaun kontinua halo hela prosesu sira, nune’e bele aselera tiha hodi submete hamutuk ho dadus 600 nian ne’e ba finansa sentrál. “Kuandu dadus tama hotu ona iha sistema, Komisaun bele enkamiña sira-nian dadus atu públika iha Jornál Repúblika depois haruka ba Finansa atubele prosesa ona sira-nian saláriu”.
Profesora Maria da Costa ne’ebé ninia dadus tama iha verifikasaun faze daruak ne’e kontinua tau konfiansa ba komisaun katak sei iha solusaun atu rezolve tanba ninia dokumentu kumpre ona rekizitu sira.
“Fiar katak ohin ka aban prosesu hotu sei la’o normál no ami-nian dadus sira ne’ebé seidauk deteta husi sistema foun ne’e bele rezolvidu atu tau hamutuk ho dadus ema na’in-600 ne’e hodi prosesa ona”, realsa.
Notísia relevante: ME sei finaliza verifikasaun dadus rejime espesiál faze segunda
Jornalista: Tomé Amado
Editora: Maria Auxiliadora
