DILI, 27 dezembru 2023 (TATOLI) – Ministériu Edukasaun (ME) kontinua halo prosesu verifikasaun dadus ba profesór kontratadu rejime espesiál ba segunda faze ne’ebé tuir planu sei finaliza iha fulan dezembru tinan ida-ne’e.
“Dadus profesór kontratadu sira ba rejime espesiál segunda faze nian ami sei halo hela prosesu, maibé iha ona lista profesór hamutuk 556 nian mak ami taka sai ona iha kada munisípiu. Dadus sira-ne’e foin mak iha faze verifikasaun,” Diretór Rekursu Umanu ME, Anita Tavares Ribeiro de Jesus ba jornalista iha nia servisu fatin, ME, Vila Verde, kuarta ne’e.
Nia esplika katak bainhira dadus sira-ne’e kompletu hotu ona mak Ministériu Edukasaun sei hasai fali despaixu, nune’e lista ne’ebé taka sai iha kada munisípiu sira-ne’e profesór sira bele haree sira-nia naran rejistadu ka lae.
Tuir Anita katak lista ne’ebé Rekursu Umanu Ministériu Edukasaun hasai ne’e la’ós lista finál ona, maibé foin lista verifikasaun. Prosesu sira-ne’e Rekursu Umanu tenke halo hodibele enkamiña ba Komisaun Funsaun Públika. Tanba ne’e, husu ba profesór sira hotu iha territóriu nasionál katak iha 27 dezembru 2023 ne’e hotu-hotu tenke mai kompleta sira-nia dokumentu iha ME nune’e bele tama iha dadus elijível hodibele kumpri rekizitu hotu.
Dadus profesór sira-nian kuandu submetidu ona, nia haklaken, parte Rekursu Umanu hahú 29 dezembru 2023 sei enkamiña ba Komisaun Funsaun Públika, nune’e bele hasai ona despaixu hodibele públika iha Jornal da República.
Dirijente ne’e haktuir katak balun nia diploma la legalizadu no sira-nia avaliasaun dezempeñu la rejistadu, depois sira-nia diploma hateten sira ‘12 anos de escolaridade’ ka sekundáriu, entaun ida-ne’e labele foti tanba sira-nia kritériu tenké mínimu baxarelatu.
Dadus verifikasaun ba profesór kontratadu sira sei terminadu de’it iha faze segunda, kerdizer Ministériu Edukasaun sei la koke tan faze terseira hodi simu dadus profesór kontratadu sira-nian. Nune’e, husi dadus profesór kontratadu 5.009 ne’ebé rejistu ona iha faze primeira kuaze iha ona profesór kontratadu hamutuk 4.089 mak sira-nia dadus elijível ona.
Jornalista: Tomé Amado
Editór: Rafael Ximenes de A. Belo
