DILI, 09 Setembru 2025 (TATOLI)—Ministériu Edukasaun (ME), Tersa ne’e, lansa ona uniforme eskolár iha Eskola Sekundária Jerál (ESJ) 04 UNAMET Balide, ne’ebé hatudu identidade kada eskola iha territóriu.
“Ha’u hanoin katak eskola Sekundáriu Jerál 04 Setembru UNAMET mak hanesan eskola ne’ebé uza uniforme ikusliu iha Dili tanba eskola hotu-hotu iha munisípiu hahú husi pre-eskolár to’o ensinu sekundáriu utiliza hotu ona uniforme eskolár. Ita konsidera uniforme eskolár importante ba estudante sira hodi utiliza no ida-ne’e hatudu identidade eskola ida-idak nian,” Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopez Lemos dehan ba jornalista sira iha abertura lansamentu uniforme eskolár, iha Balide.
ME lansa uniforme eskolár nasionál, PM prefere haree didi’ak
Domingos Lopez apela ba dirijente sira katak gravata ba estudante ne’e labele utiliza tais modernu ka sosa iha loja Xina.
Iha fatin hanesan, Diretór ESJ 04 Setembru UNAMET Balide, Sergio da Cruz hateten ohin estudante sira konsege simu uniforme eskolár kompleta ho idak-idak nia naran tanba kontribui hosi inan-aman rasik.
Enkuantu, estudante sira-ne’ebé seidauk koopera ho eskola kuaze 400, maibé eskola nafatin koopera ho inan-aman, no eskola sei la obriga inan-aman. Sira bele ba suku rasik uniforme ne’e, importante nia modelu ho kór labele diferente.
Sergio dehan tuir orientasaun husi ME katak uniforme eskolár ne’e unidade ida labele liu $25. Negosiasaun ho empreza ho volume estudante barak unidade ida kona $17, entaun unidade tolu ho sintu ida ho montante $50 ba kada estudante.
Jornalista: Osória Marques
Editór: Xisto Freitas da Piedade
