MS fó prioridade halo tratamentu dignu ba Ema ho Defisiénsia sira
DILI, 09 Setembru 2025 (TATOLI)—Koordenadora Programa Planeamentu Familiár iha Ministériu Saúde, Agostinha Segurado, hateten Ministériu saúde fó prioridade halo tratamentu dignu ba Ema ho Defisiénsia (EhD) sira iha Timor-Leste.
“Ema ho defisiénsia sira, parte Minisitériu Saude hola papel importante ida atu bele trata ema inkluzivu, entaun ho ida-ne’e mak husik kedas Ministériu Saúde iha mudansa boot, oinsá atu atende ema ho defisiénsia liuhusi kapasitasaun ba profisionál saúde hodi atende ema ho defisiénsia ho di’ak,” Agostinha Segurado hateten ba Agência Tatoli, iha Timor Plaza, ohin.
Nia dehan, husi parte asesu sira mak haree husi infraestrutura sira dezde ukun an mai to’o agora iha difirensa boot iha tinan hira mai, katak atendementu inkluzivu katak labele husik ema ida iha kotuk.
Entaun, ema ho defisiénsia sai hanesan parte importante ida ba Ministériu Saúde mak iha intraestutura ne’ebé mai ona ho kompreensivu mak inklui ona oinsá mak ho modelu infraestrutura sira asesu defisiénsia ba atendementu no mós utilizasaun ba fasilidade ne’e rasik asesu iha ne’eba.
“Iha parte seluk, hanesan toilet ka sintina públiku, ida-ne’e husi saúde integra ona ninia dezeñu ida ba iha inisiu harii fasilidade. Entaun, inklui ona iha pakote ida oinsá atu asesu ba defisiénsia iha ne’eba, dalan, odamatan no sira-ne’ebé fasilita kadeira roda no dezeña odamatan ne’ebé mak sira bele asesu ho di’ak, tanba ita hanoin ona fasilita fasilidade ida-ne’ebé mak maibé di’ak ba ema ho defisiénsia asesu ba tratamentu saúde,” nia esplika.
Nia relata, Ministériu Saúde iha ona planu asaun tinan hirak tuir mai kontinua ba manutensaun no reabilitasaun ba fasilidade saúde sira, pelu menus sira tenke kobre hotu ema ho defisiénsia sira.
Iha fatin hanesan, Diretora Jerál Kuidadu Saúde Primária, Elizabeth Leto Mau, hateten ema ho defisiénsia sai prioridade ba halo tratamentu saúde iha fasilidade saúde sira, tanba infraestrutura foun ne’ebé mak halo iha HNGV no iha ne’eba halo mós dalan (rampa) ba iha maluk sira-ne’ebé mak defisiénsia.
“Iha infraestrutura ne’e ita halo mós dalan ba haris fatin hodi prepara ba maluk sira-ne’ebé mak ho defisiénsia, maibe banhira liga ho programa defisiente ne’e implementa iha nivel sentru saúde hotu-hotu hodi sira bele asesu,” nia dehan.
Jornalista : Felicidade Ximenes
Editór : Cancio Ximenes
