DILI, 09 Setembru 2025 (TATOLI)—Komandu Jerál Polísia Nasionál Timor-Leste (PNTL) tuir planu iha Kinta (10/09) aban sei hasoru malu ho portavós universitáriu hodi define fatin ba manifestasaun hasoru Parlamentu Nasionál (PN) atu sosa karreta ba Deputadu na’in-65.
Komandante PNTL, Superintendente Xefe Polísia Orlando Gomes informa, manifestasaun ne’e sei hahú iha loron Segunda (15/09) semana oin, ho nune’e manifestante sira hato’o karta koñesimentu ba Komandu PNTL Munisípiu Dili no Komandu Jerál PNTL Komisáriu Jerál Polísia Henrique da Costa, nune’e sira hasai ona despaixu mai Komandante Operasaun Nasionál hodi fó seguransa.
“Ami halo enkontru atu nune’e bele notifika ba portavós sira mai enkontru hodi bele deside buat hotu tuir Lei Manifestasaun nian. Daudaun ami sei analiza no deside fatin ne’ebé mak merese atu halo manifestasaun,” Orlando Gomes hato’o ba Jornalista sira iha nia knaar fatin, Komandu PNTL Dili, Kaikoli, Tersa ne’e.
Notísia relevante : Karreta foun ba PN: Orsamentu millaun $4,2 aprova ona iha OJE 2025
Tuir Lei Manifestasaun númeru 1/2006 08 Fevereiru ne’ebé ko’alia kona-ba liberdade ba reauniaun no manifestasaun iha artigu 5 kona-ba restrisaun ba manifestasaun, iha i alinea primeiru bandu atu realiza reuniaun no manifestasaun iha fatin públiku ka nakloke ba públiku menus husi metru 100 husi fatin ne’ebé lokaliza sede órgaun soberania, rezidénsia ofisiál titulár órgaun soberanian, instalasaun militár no militarizada, estabelesimentu prizionál, sede reprezentasaun diplomátika no konsulár inklui sede partidu polítiku.
“Lei mós fó kompeténsia ba Polísia atu deside fatin halo manifestasaun, lei fo biban no kompeténsia atu organiza manifestasaun ne’e la’o di’ak, labele kria fali instabilidade iha Timor-Leste,” nia katak.
Tanba ne’e, iha Kinta (10/09) aban Komandante PNTL sei enkontru ho portavós manifestante sira hotu atu deside buat balun atu nune’e realizasaun ba manifestasaun ne’e bele la’o ho di’ak.
“Komandante Operasaun Nasionál sei notifika hodi bolu Komandu Munisípiu Dili atu tuur hamutuk hodi diskute ho reprezentante manifestante hodi deside fatin ba halo asaun manifestasaun no reprezentante sira mós sei kompromente hamutuk ho Polísia katak manifestasaun sei la’o di’ak,” nia akresenta.
Komadante PNTL munisípiu Dili garante katak situasaun hotu bele la’o ho di’ak durante manifestasaun, tanba autoridade seguransa sei halo atuasaun bazeia ba lei no la halo atuasaun abuzu poder, maibé Polísia halo atuasaun nafatin kumpre Lei Forsa ninian depende grau situasaun ne’ebé mak iha.
“Ha’u fiar katak estudante universitáriu sira halo manifestasaun pasífiku ho regras, tanba sira mos hanesan estudante hatene kumpre lei, sira hatene hadomi rai ida-ne’e nune’e tenke halo manifestasaun tuir lei,” nia hato’o.
Jornalista : Natalino Costa
Editora : Julia Chatarina
