Austrália lansa programa feto fundadora apoia emprezária hodi dezenvolve negósiu
DILI, 10 Setembru 2025 (TATOLI)—Good Business Foundation no Governu Austrália liuhusi Programa Parseria ba Prosperidade Inkluziva (PROSIVU), lansa ona programa feto fundadora hodi apoia feto emprezária sira atu dezenvolve sira-nia negósiu.
“Governu Austrália servisu hamutuk ho Governu Timor-Leste ho Good Business, fasilita abilidade atu eleva grupu feto negósiu timoroan hamutuk na’in-ualu (8), ne’ebé maihusi negósiu oinoin,” Vise Embaixadór Australia iha Timor-Leste, Edward Wilkinson dehan ba jornalista sira, iha Maubara Room Timor Plaza, Kuarta ne’e.
Edward Wilkinson informa programa feto fundadora, hanesan programa importante ida atu apoia feto timoroan sira-nia iha abilidade, rekursu no rede atu haburas iha negósiu.
“Emprezáriu sira-ne’e nia negósiu hanesan turizmu, moda, otelária, ambiente, teknolojia no agrikultura,” nia hateten.
Tanba ne’e, Governu Austrália nafatin hamriik hamutuk ho Timor-Leste hodi kompromete ba dezenvolvimentu sustentavel sira.
“Ami fiar katak fó kbi’it ba feto sira la’ós de’it fó benefísiu ba feto sira, maibé ida ne’e mós dalan ida-ne’ebé di’ak atu hatudu kreximentu ekonómiku, inovasaun ba progresu sosiál sira,” Edward informa.
Wilkinson subliña programa feto fundadora eziste atu apoia feto timoroan sira, haburas sira-nia negósiu liuhusi dalan treinamentu no monitorizasaun hodi hasa’e kreximentu.
“Ita hotu hatene katak feto sira hasoru dezafiu ne’ebé úniku iha Timor-Leste, hanesan asesu limitadu ba kapitál no mós menus reprezentasaun iha papél lideransa nian,” Edward tenik.
Nune’e, tuir nia, programa referidu marka pasu di’ak ida, atu harahun barreira sira-ne’ebé la tuir dalan justu no ekosistema emprezáriu sira-nian.
Notísia relevante: Emprezaria Clarissa Lay kria alfaeate apoiu ba feto sira
Entretantu, Governu Austrália apoiu programa dahuluk feto fundadora ho orsametu rihun $80.
Iha fatin hanesan, Chief Executive Officer Good Business Fundation, Petter McMullin AM, hateten agora tempu atu feto sira hakat bá-oin hodi hetan rekoñesimentu apoiu ba sira. Tanba ida-ne’e hanesan polítika ida-ne’ebé importante tebes, atu habelar no diversifika ekonomia Timor-Leste nian mak esensiál liu.
“Durante tinan barak ona ha’u haree determinasaun no kriatividade husi líder emprezáriu ki’ik sira nu’udár programa ida-ne’ebé rekoñese no apoiu enerjia emprezária sira-ne’e,” nia haktuir.
Nune’e mós, Vise Primeiru-Ministru, Ministru Koordendór Ekonomia no Ministru Turizmu no Ambiente, Francisco Kalbuadi Lay parabeniza Governu Austrália ne’ebé lansa ona programa referidu.
“Programa ida-ne’e, iha pontu tolu. Ha’u tenke temi uluk. La’ós de’it halo feto sira sai forte liu, maibé ida-ne’e mós kria no treina sira atu sai líder iha futuru, liuliu iha empreendedorizmu, abilidade no negósiu. Ida-ne’e esperansa no futuru ida,” Kalbuadi dehan.
Lay espera katak Governu sei kontribui no servisu hamutuk ho Governu Austrália hodi aprezenta tan ba programa sira-ne’e.
“Ha’u-nia parte nu’udár ministru asuntu ekonómiku, ha’u bele dehan katak ha’u iha apoiu ema barak, maibé ha’u iha duni programa ne’e atu ajuda. Ida-ne’e ba komérsiu no asosiasaun indústria nian no mós ba feto sira,” Kalbuadi akresenta.
Governante ne’e kompromete atu tau-atensaun ba feto sira, kria kampu no ajuda sira sai profisionál iha abilidade ida-ne’ebé di’ak no sai líder ida iha futuru, ba área negósiu nian, liuliu atu servisu hamutuk ho Governu hodi dudu kreximentu ekonómiku.
Entretantu, Benefisiáriu ba Programa Feto Fundadora no Chief Executive Ha-Ha Kafe no Wine Bar, Madalena da Cruz dehan programa referidu ajuda tebes feto emprezária sira.
“Ha’u hanoin programa ne’e ajuda tebes feto emprezária sira tanba Timor seidauk iha. Tanba ne’e, ha’u espera katak sira bele hanorin ami barak liu kona-ba lideransa iha negósiu. Espera katak bainhira ramata iha negósiu, bele sai feto ne’ebé forte no sai líder ne’ebé di’ak ba futuru,” nia konklui.
Jornalista: Osória Marques
Editór: Xisto Freitas da Piedade
