DILI, 10 Setembru 2025 (TATOLI)—Autoridade Inspesaun Fiskalizasaun Atividade Ekonómika Sanitária no Alimentár (AIFAESA), kuarta ne’e, halo selajen ba Empreza Korudo Lda, ne’ebé faan produtu ho marka liafuan la edukativu.
Notísia Relevante: Abríl-Juñu, AIFAESA halo inspesaun ba operadór ekonómiku hamutuk 826
“Iha loron 04 Setembru ita hetan keixa husi komunidade kona-ba produtu ne’ebé mak komersializa iha merkadu produtu ne’ebé ho marka hakerek liafuan kro’at (tolok). Entaun, bazeia ba iha lei protesaun konsumidór númeru 8/2016, 08 Jullu, AFAESA foti inisiativa koordena ho Polisia Nasionál Timor-Leste (PNTL) ho Servisu Investigasaun Kriminál tun ba loja ne’ebé identifikadu hodi tau selajen,” Inspetora Jerál AIFAESA, Odete da Silva Viegas, hateten ba jornalista sira iha Matadoru.
Nia informa, Empreza Korudo Lda lokaliza iha Manleuana no nia sanak ida iha Fatuhada ne’e mak sirkula hela produtu ne’e no ekipa konsege halo selajen ba iha armajen ida iha Manleuana no mós loja boot da iha Fatuhada.
Nia hateten, situasaun ne’e akontese no publiku mós kestiona kona-ba produtu ne’ebé komersializa iha Timor-Leste maibé ho marka ida-ne’ebé hakerek ho liafuan la edukativu.
“Agora ami rasik hatene katak naran ne’e aifuan nia naran maibé iha ita-boot nia rain, agora produtu ne’e ita-boot faan iha Timor. Se produtu ne’e faan iha ita-boot nia rain ne’e problema seluk maibé produtu ne’e faan iha Timor-Leste, liafuan ne’e rasik la’ós ema-boot de’it mak hatene, maibé labaraik kiik mós lee komperende kona ba signifikadu husi liafuan ne’e,” nia hateten.
Tanba ne’e, nia hateten, AIFAESA iha kompeténsia tuir dekretu-lei ne’ebé iha hodi halo intervensaun ba empreza ne’e.
“Ami-nia papel tama mós iha publisidade abuzivu, entaun ida-ne’e ofende mós konsumidór sira no ofende Estadu, tanba ne’e mak produtu ne’e ami halo selajen,” nia dehan.
Nia hatutan, produtu ne’ebé ho marka hakerek liafuan la edukativu ne’e la’ós sirkula de’it iha kapitál Dili maibé to’o ona iha Munisípiu Baukau no Rejiaun Administrativu Oekusi Ambeno (RAEOA).
“Iha RAEOA, ekipa AIFAESA Dili informa ona ba ekipa AIFAESA iha RAEOA sira foti ona ES ne’e hamutuk kaixa haat (4). Ami mós komunika ona Diretór Seguransa Alimentár iha Bauakau atu tun ba terrenu hodi revista loja ida-ne’ebé mak sira faan ona ES ida-ne’e, atu nune’e sira identifikano sei informa fali mai AIFAESA atu ekipa sira tun hodi rekolla fali produtu sira ne’e,” nia dehan.
Iha oportunidade ne’e, nia husu mós ba empreza ne’ebé presta ona deklarasaun, di’ak-liu rekolla rasik produtu ne’ebé mak espalla ona iha munisípiu hotu.
“Produtu ne’ebé mak ita tau selajen hamutuk kaixa 2.500 no ita mós halo enseramentu temporária ba iha empreza ne’e nia atividade. Aleinde ne’e, sansaun administartivu ita kontinua la’o no ohin ita notifika ona empreza nia atividade temporária hodi hein prosesu tuir mai,” nia katak.
Enkuantu, kona-ba direitu traballadór hotu ne’ebé servisu iha Empreza sei la afeta no saláriu kontinua la’o tanba AIFAESA tau selajen durante loron 30 hodi hein prosesu adminsitrativa ne’ebé mak sei mai.
Kona-ba produtu ho marka ne’ebé hakerek liafuan la edukativu ne’ebé AIFAESA rekolla ona, kinta (11 Setembru 2025) aban, sei halo destroisaun iha lixeiru Tibar.
Jornalista : Felicidade Ximenes
Editór : Cancio Ximenes
