DILI, 10 Setembru 2025 (TATOLI) – Governu Austrália liuhusi nia Embaixada iha Timor-Leste fó hanoin ba públiku, liuliu sidadaun Timor-Leste atu nafatin matan-moris hasoru risku fraude ne’ebé nia alvu ba kandidatu sira vistu nian, partikularmente sira ne’ebé kandidata ba programa Pacific Engagement Visa (PEV).
“Ami hatene risku husi fraude ba aplika vistu sira ne’ebé daudaun la’o hela nia alvu ba sidadaun sira husi Timor-Leste ne’ebé atu asesu ba PEV tenke matan-moris, tanba iha pájina barak ne’ebé bele bosok”, haktuir pájina ofisiál Embaixada Austrália iha Timor-Leste, ne’ebé Tatoli asesu, ohin.
Tuir nota ne’e, públiku atu hatene informasaun klara kona-ba kandidatura vistu ne’e importante akompaña kanál ofisiál sira Governu Austrália nian ba tranzasaun no informasaun hotu-hotu. Kanál ofisiál sira-ne’ebé bele asesu mak husi Departamentu Negósiu Internu Austrália nian no Departamentu Negósiu Estranjeiru no Komérsiu (DFAT), no mós servisu ofisiál apoiu PEV nian iha Timor-Leste liuhusi e-mail iha timorleste@pevsupport.com.au ka sítiu https://www.pev.gov.au.
“Atu proteje an husi fraude vistu nian, ita tenke halo de’it tranzasaun liuhusi kanál informasaun ofisiál sira Governu Austrália nian, hanesan web Departamentu Asuntu Internu (DFAT) ka Servisu Apoiu Ofisiál PEV nian iha Timor-Leste”, refere husi komunikadu ne’e.
Biban ne’e, embaixada mós husu ba públiku atu verifika nafatin informasaun nia autentisidade molok halo atuasaun ba oferta vistu ruma ka pedidu pagamentu ruma hodi evita fraude ne’ebé bele prejudika.
PEV nu’udar vistu rezidénsia permanente (subklase 192) ba sidadaun nasaun illa pasífiku no Timor-Leste. Kada tinan, vistu ne’e disponivel to’o rihun 3, liuhusi prosesu sorteiu públiku, ne’ebé fornese oportunidade justu ba indivíduu sira ho orijen no abilidade oioin.
Kritériu mak ba kandidatu sira ne’ebé elejivel bele rejista liuhusi ImmiAccount ho folin AU$25. Kandidatu sira ne’ebé maka hili ho maneira aleatória sei hetan konvite atu konkorre ba vistu, inklui membru família sira ne’ebé rejista ona.
Kandidatu sira tenke iha oferta serbisu ne’ebé válidu iha Austrália no prienxe kritériu sira hanesan livre husi moras, hatene lia-inglés. Informasaun detallu bele liuhusi pev.gov.au no website Department of Home Affairs.
Partisipante sira ne’ebé selesionadu sei hetan asesu ba servisu gratuitu, inklui sesaun informasaun kona-ba oportunidade serbisu iha fatin oioin iha Austrália no seluk tan.
Programa ne’e nakloke ba sidadaun Timor-Leste, Fiji, Papua Nova-Giné, Samoa, Illa Salomaun, Tonga, Vanuatu, Estadu Federadu Mikronézia, Nauru, Palau, no Kiribati. Informasaun espesífiku no sesaun informasaun iha Timor-Leste bele asesu liuhusi website ofisial pev.gov.au.
Rejistu ba sorteiu PEV 2025 taka iha loron 25 Agostu tinan 2025. Prosesu selesaun sei hala’o iha loron 01 Setembru tinan 2025, to’o loron 01 Fevereiru tinan 2026, no partisipante sira ne’ebé selesionadu sei simu notifikasaun ofisiál liuhusi e-mail kona-ba pasu sira tuirmai ba kandidatura ba vistu.
Jornalista: Arminda Fonseca
Editora: Maria Auxiliadora
