Governu prevee rihun $279 ba akizisaun transporte fogu artifisiál
DILI, 10 Setembru 2025 (TATOLI) – Governu autoriza akizisaun no transporte fogu artifisiál sira ne’ebé ho objetivu atu hala’o selebrasaun ofisiál ba Aniversáriu Proklamasaun Independénsia Nasionál nian ba da-50, ne’ebé selebra iha loron 28 Novembru.
Tuir nota husi Governu, desizaun ne’e permite ba Komisaun Organizadora selebrasaun hodi sosa materiál pirotékniku, kontratasaun nia transporte ba Timor-Leste no organiza espetákulu sira, ne’ebé sei hala’o iha postu administrativu sira hotu iha territóriu nasionál.
“Totál montante autorizadu ba despeza sira-ne’e hamutuk maizumenus rihun $279”, refere dokumentu ne’e.
Aleinde ne’e, Konsellu Ministru mós delibera hodi autoriza Ministra Finansa atu autoriza izensaun ba pagamentu impostu, taxa, direitu aduaneiru no impozisaun sira seluk, iha ámbitu konstrusaun Alberge/dormitóriu Menina Canossiana no Kapela ida iha Dili.
Projetu ida ne’ebé finansia tomak husi Ajénsia Emiradu ba Ajuda Internasionál, husi Emiradu Árabe Unidu. Deside mós pagamentu ba enkargu fiskál no aduaneiru ne’ebé relasiona ho konstrusaun husi Albergue ne’ebé temi ona, iha Meninas Canossianas nia naran.
Jornalista: Arminda Fonseca
Editora: Maria Auxiliadora
