DILI, 10 Setembru 2025 (TATOLI)-Arsebispu Arkidioseze Metropilitana Dili, Don Virgílio Kardeál do Carmo da Silva, SDB, hateten selebrasaun misa aniversáriu dahuluk vizita Papa Francisco mai Timor-Leste nu’udar jestu ida atu hametin valór espirituál ne’ebé sarani sira hetan husi vizita Papa nian.
“Loos duni, kalan furak ida-ne’e ba ita hotu halibur iha Tasi Tolu, fatin ne’ebé riku tebes ho valór istoriku, kulturál, liuliu valór espirituál. Atu ita hanoin filafali esperiénsia furak hotu ne’ebé sarani timoroan hetan ho maktoban Papa Francisco iha nia vizita tinan kotuk”, Don Virgílio hateten iha diskursu iha Tasi Tolu.
Nia dehan aleinde hanoin filafali mensajen furak sira husi Papa Francisco ne’ebé husik hela ba timoroan sira no kalan ida-ne’e aproveita mós nu’udar kalan agradesimentu nian, haleu altar santu ninian sarani sira mai tuku tuur hasa’e eukaristia santa sinál nu’udar gratidaun ba Maromak ba di’ak tomak ne’ebé povu Timor-Leste simu liuhusi vizita Papa Francisco nian.
“Atu Amu Papa nia liafuan di’ak sira ne’ebé nia hato’o mai ita husu hadomi malu, hadomi kultura, no nia laran-monu ba Timór, tanba liuhusi fiar ne’ebé ita iha nune’e liuliu labarik foinsa’e, katuas-ferik mai ita hamutuk nu’udar maun-alin nafatin iha Kristu. Kalan ida-ne’e sai tan realidade ksolok ba ita tanba ema barak fó liman ba malu”, dehan.
Iha biban ne’e, ulun boot ba uma-kreda Timor-Leste ne’e la haluha agradese ba Governu nia apoiu tomak durante vizita Papa Francisco no ohin loron realiza tan misa aniversáriu dahuluk vizita Papa Francisco nian.
Nia agradese mós ba parte hotu nia kontribuisaun, liuliu ba seguransa Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL) ne’ebé sempre fó apoiu ba atividade hotu la’o ho di’ak.
Notísia relevante: Sarani tenke banati lala’ok Nossa Senhora tuir omília Papa Francisco
Jornalista: Arminda Fonseca
Editora: Maria Auxiliadora
