MS halo promosaun ba profisionál saúde molok tama ba reforma obrigatóriu
DILI, 10 Setembru 2025 (TATOLI)—Ministra Saúde, Élia dos Reis Amaral, hateten Ministériu Saúde hahú halo preparasaun no promosaun ba Profisionál Saúde sira, molok tama ba reforma obrigatóriu.
Tuir planu husi Komisaun Funsaun Públika ne’ebé sei halo reforma obrigatóriu iha Timor-Leste mak daudaun ne’e Ministériu Saúde hahú prepara promosaun ba Profisionál Saúde sira molok tama ba reforma obrigatóriu iha tinan 2026.
“Ami ho Komisaun Funsaun Públika sei iha komisaun ida, maibé ami rasik identifika ona Profisionál Saúde hamutuk 100-resin atu tama ba reforma obrigatóriu iha tinan oin. Maibé ida ne’e foin númeru, signifika depois ita haree fali ami sei informa ba ita boot sira,” Ministra Saúde, Élia dos Reis Amaral, hateten ba jornalista sira hafoin partisipa iha reuniaun Konsellu Ministru, ohin.
Nia hateten, Ministériu Saúde komesa hahú prepara promosaun no valorizasaun ba Karreira ne’ebé mak iha atu nune’e profisionál saúde sira hahú husi level kraik mak ba leten.
“Ita prepara ne’e mak ita hahú hako promosaun ba iha valorizasaun karreira ne’ebé iha, atu nune’e sira husi level kraik ba leten. Depois tuir métodu ne’ebé ita implementa iha Funsaun Públika,” nia dehan.
Nia subliña, kona-ba rekrutamentu ne’e, depois fó tiha valorizasaun karreira ba profisionál saúde sira sai hanesan funsionáriu públiku mak foin halo fali rekrutamentu, tanba sira servisu kuaze iha tinan barak nia laran.
“Rekrutamentu ne’e depois akaba karreira, halo valorizasaun karreira, ne’ebé sira hanesan funsionáriu públiku tinan barak nia laran. Sira laiha oportunidade atu hetan promosaun, ita hahú tiha ida-ne’e depois ita haree fali ba iha mapamentu. Depois ami sei informa, atu nune’e ita bele haree katak sira la’ós mai husi kazuál, orsida ita sei hadi’a situasaun ida-ne’e,” nia dehan.
Jornalista : Felicidade Ximenes
Editór : Cancio Ximenes
