DILI, 10 Setembru 2025 (TATOLI)–Polísia Nasionál Timor-Leste (PNTL) la autoriza Estudante Universitáriu Timor-Leste (EUTL) atu halo manifestasaun iha resintu Universidade Nasionál Timor-Leste (UNTL) tanba konsidera fatin ne’e besik liu edifísiu públiku sira.
Komandante Operasaun Nasionál Superintente Xefe Polísia Justinho Menezes haktuir, ohin Komandu Operasaun hamutuk ho Komandante PNTL no Komandabte Unidade Espesiál Polísia Diretór Diresaun sira inklui Xefe Departamentu Komandu PNTL halo enkontru ho Estudante Universitáriu Timor-Leste hodi ko’alia kona-ba aseitasaun fatin ba manifestasaun hasoru Parlamentu sosa veíkulu 65.
“Ita aseita sira bele halo espresaun ba sira-nia polítika, sira-nia hanoin kontra desizaun liuhusi manifestasaun, ita aseita. Tanba ne’e mak ita bolu sira para ita define fatin, maibé liuhusi reuniaun ohin ne’e, sira (estudante universitáriu) mantein no lakohi muda sira-nia pozisaun, katak sira hakarak halo manifestasaun iha resintu Univeridade Nasionál Timor-Leste, maibé ida besik liu resintu Parlamentu Nasionál tuir lei ne’e labele,” Komandante Operasaun Nasionál hateten ba Jornalista sira hafoin hasoru malu ho Portavós EUTL iha Komandu Jerál PNTL, Kaikoli, Kuarta ne’e.
Notísia relevante : PNTL sei hasoru portavós universitáriu hodi aborda manifestasaun tuir mai
Nia dehan, PNTL só autoriza estudante sira halo asaun enkontru no konferénsia imprensa iha aeredores UNTL no sei apoia hodi fó seguransa maibé atu halo manifestasaun no halo asaun sai to’o li’ur ne’e la autoriza.
Komandante Operasaun hatutan, bazeia ba lei númeru 1/2006 artigu 13, Autoridade Polísiál mak define fatin ba reuniaun sira no husi lei ne’e hateten manifestasaun tenke metru 100 husi fatin públiku no edifísiu Estadu sira.
“Entaun iha Dili laran ne’e laiha. Tanba ne’e mak ohin ita define hodi hateten ba sira katak sira bele halo manifestasaun, maibé iha Tasi-tolu, depois ita bele akompaña to’o fulan-ida ka semana ida ka rua laiha problema,” nia akresenta.
Justinho konta tuir, iha reuniaun ohin Portavóz Estudante Universitáriu la konkorda fatin ne’ebé Polísia determina ona ba sira no mantein hala’o atividade iha resintu UNTL.
“Ami deside fatin manifestasaun ne’e Tasi-tolu, iha ne’ebá ne’e livre no konfortável para sira bele espresa sira-nia hanoin. Maibé, sira la aseita, ida-ne’e mak sira sei filafali ba konsulta, tanba manifestasaun ne’ebé atu halo iha loron 15 Setembru 2025 ami sei kansela tanba fatin ba manifestasaun sira la konkorda ka seidauk konkorda, seidauk aseita. Sira hakarak de’it iha sira-nia aredores, maibé ne’e labele,” Komandante Operasaun katak.
Nia dehan, bainhira estudante universitáriu sira viola kondisaun sira ne’e maka Polísia sira sei foti medida tuir lei haruka.
“Hakarak apela ba estudante sira, alin estudante sira desizaun ba manifestasaun ne’e tenke desizaun kolletiva, liuliu kona-ba fatin ba manifestasaun nian. Ami espera sira bele ba deside para ami bele iha resposta lalais nune’e sira mai fali ita bele deside tempu demostrasaun,” Komandante katak.
Nune’e, parte Polísia husu atu estudante sira bele halo manifestasaun iha fatin ne’ebé define ona, nune’e bele la’o ho di’ak no pasífiku.
PNTL daudaun ne’e simu karta husi UETL, ne’ebé ho ninia konteúdu hakarak halo demostrasaun, maibé seidauk simu karta ruma husi Sosiedade Sivil.
Tuir lei númeru 1/2006, katak sé mak hakarak halo manifestasaun tenke iha karta koñesimentu ba Polísia no Autoridade Seguransa ne’e mak define fatin halo manifestasaun.
“Kuandu demostrasaun mak mosu buat ruma PNTL sei husu responsabilidade ba Portavos sira. Tanba sira-nia karta ne’e sira promete katak sira de’it, maibé sira seluk mak tama entaun sei halo atuasaun,” Komandante Operasaun hato’’.
Jornalista : Natalino Costa
Editora : Julia Chatarina
