DILI, 10 Setembru 2025 (TATOLI)-Iha selebrasaun misa solene ba aniversáriu dahuluk vizita Papa Francisco mai Timor-Leste, Enkarregadu Asuntu Santa Sé iha Timor Leste, Mgr. Marcel Smejkal, hateten Timor-Leste nia istória fiar nian nafatin nabilan iha igreja Timor Lorosa’e.
Nia hato’o agradesimentu kle’an ba Maromak ne’ebé husik hamoris filafali espíritu fiar, ksolok no grasa peregrinasaun Santu Padre Papa Francisco nian iha nasaun ne’e.
Nia lembra iha tinan ida liubá, momentu ne’e grava nafatin iha igreja Timor Lorosa’e nia memória, pájina nabilan ida kona-ba ninia istória fiar, sakrifísiu no esperansa nian.
“Ha’u agradese ho laran tomak ba komunidade relijioza no povu konsagradu sira, no liuliu, imi, Maromak nia Povu Santu. Ohin ita-boot sira mai ho númeru boot atu agradese ba Na’i no hafoun ita-boot sira-nia kompromisu ba fiar moris nian no konsisténsia laran-lu’ak nian. Imi-nia prezensa fó sasin kona-ba oinsá hametin imi-nia viajen fiar nian”, Marcel Smejkal hateten iha Tasi Tolu, ohin.
Nia subliña katak iha vizita Papa Francisco ne’e fó hanoin ba sarani Timór kona-ba fiar loos. “Ita-boot nia fiar sai ita-boot nia kultura. Nune’e atu fiar ida-ne’e fó naroman no sustenta ita-boot iha moris iha pasadu kontinua inspira ita-boot nia moris prezente no ba ita-boot nia futuru”.
“Ohin, konvite ida-ne’e rekupera liután, maibé imi-nia fiar ne’ebé imi simu husi misionáriu sira ne’ebé fakar sira-nia raan, tenke kontinua sai naroman ba adiamentu dame nian iha sosiedade. Ida-ne’e hanesan fonte esperansa nian ba jerasaun foun sira”, hateten.
Iha biban ne’e, nia parte mós lee sai mensajen husi Papa Leão XIV ne’ebé hateten garante nafatin fó ninia bensaun ba povu Timor-Leste liuhusi nia orasaun.
“Nia lori imi iha ninia kompañia husi fuan, ho ninia orasaun sira, atu Timor-Leste, rai joven ida, bele sai fonte esperansa nian no buras nafatin iha armonia, justisa, no solidariedade”, nia subliña.
Biban ne’e, nia parte husu sarani hotu atu hasa’e nafatin devosaun ba Na’in-Feto Virjen Imaculada atu tau matan povu ida-ne’e ba dalan futuru ne’ebé di’ak liu, bele proteje povu Timor-Leste iha susar sira, fó kmaan ba iha difikuldade sira, no orienta povu ida-ne’e ho fuan ne’ebé metin ba Kristu.
Notísia relevante: Misa aniversáriu dahuluk vizita Papa Francisco hanesan jestu hametin valór espirituál
Jornalista: Arminda Fonseca
Editora: Maria Auxiliadora
