DILI 10 Setembru 2025 (TATOLI)—Vise-Ministru Asuntu Fortalesimentu Instituisionál, Paulo Remdios hamutuk ho nia ekipa halo vizita bá Diresaun Jerál Servisu Rejistu Notariadu (DGSRN) iha Ministériu Justisa (MJ), ne’ebé identifika katak ekipamentu balun ho kondisaun la favorável ona atu uza ba atendimentu.
“Iha ne’e loos duni katak komputadór ne’ebé uza hodi halo atendimentu ba Rejistu Kriminál barak mak ho kondisaun a’at ona, tanba komputadór barak ne’e desde tinan 2008 to’o mai agora sei uza hodi halo atendimentu,” Vise-Ministru Remedios informa ba Ajénsia TATOLI, hafoin observa servisu atendimentu iha Diresaun Jerál Servisu Rejistu Notariadu, iha Kolmera, Kuarta ne’e.
Nia dehan, ohin Diretór Jerál Servisu Rejistu Notariadu inklui funsionáriu sira informa katak komputadór sira ne’e nia kondisaun ladún di’ak no dalaruma bainhira halo hela atendimentu, derrepente manas no avaria.
Notísia relevante : Janeiru-Jullu, Notariadu Vikeke prodús BI no Sertidaun Moris hamutuk 8.853
Funsionáriu sira mós informa ba governante ne’e katak, mákina imprimi boot rua mak avaria inklui laiha fatin atu rai arkivu sira.
“Ha’u halo ona pedidu ba apeovizionamentu Ministériu Justisa hodi halo akizisaun ba ekipamentu sira ne’e no ha’u mós halo ona pedidu atu halo fatin arkivamentu ida iha ne’e hodi bele rai arkivu sira,” Vise-Ministru akresenta.
Governante ne’e konsidera fasilidade hirak ne’e
tenke rezolve tanba liga ho atendimentu públiku, nune’e bele hadi’a atendimentu.
“Ha’u halo ona pedidu atu rezolve kestaun sira ne’e, ida-ne’e sériu ita tenke rezolve duni hodi fó atendimentu ba ita-nia komunidade,” nia tenik.
Jornalista : Natalino Costa
Editora : Julia Chatarina
