DILI, 11 Setembru 2025 (TATOLI)—Diretór Jerál Polítika Planeamentu Kooperasaun no Dezenvolvimentu Saúde iha Ministériu Saúde (MS), Narsicio Fernandes, hateten ekipa sei esforsu hodi finaliza sertifikadu vasina COVID-19 bá aplikante vaga online Nova Zelandia nian molok loron aplikasaun termina.
Notísia Relevante: SEFOPE hahú anúnsiu vaga online ba joven sira servisu iha Nova Zelandia
“Liu husi koordenasaun ne’ebé ha’u ho Diretóra Kuidadu Saúde Primaria, no enkontru ne’ebé halo ho Diretór Kooperativu SEFOPE nian, ami iha konkordánsia fasilita kedas servisu ne’e. Entaun, ami kria kedan ekipa ne’ebé boot hodi halo atendementu no atribui sertifikadu vasina ba kandidatu sira molok to’o loron aplikasaun termina, sira tenke hetan hotu ona sertifikadu ne’e,” Narsicio Fernandes hateten ba jornalista sira iha edifisiu MS Kaikoli Dili, kinta ne’e.
Nia dehan, haree ba loron aplikasaun ba vaga referidu badak tebes, ekipa ne’ebé forma ona sei hala’o servisu ne’ebé másimu hodi halo atendementu seriu ba sidadaun sira.
“Ohin, sei laiha tan pendente ba sertifikadu. Ohin mós, ha’u orienta ekipa ne’ebé tau matan ba ida-ne’e atu bele atende sira hotu, nune’e sira bele hetan oportunidade hodi bele aplika ba vaga ne’e,” nia dehan.
Nia hatutan, ekipa ne’ebé halo atendementu haree aplikante sira-nia kartaun kinur vasina iha, signifika sidadaun ne’e hetan ona vasina no tenke prodús lalais nia sertifikadu.
Aleinde ne’e, nia fó ona orientasaun ba Sentru Saúde Formosa no Vera Cruz atu halo vasina ba joven sira-ne’ebé seidauk simu vasina, atu nune’e bele hetan kartaun hodi fasilita kualker aplikasaun vaga iha futuru.
Iha fatin hanesan, sidadaun ne’ebé trata sertifikadu vasina, Reinaldo de Jesus Xavier, hateten iha esperansa atu hetan duni sertifikadu vasina maske tarde no la konsege aplika iha vaga Nova Zelandia etapa primeiru maibé rezerva ba etapa tuir mai.
“Ladun iha ona posibilidade ba ami atu aplika vaga Nova Zelandia nian, tanba loron hira ami mai iha ne’e ema ne’ebé halo atendimentu ne’e, haruka ami ba Likisa atu foti Kode-Pin kartaun nian, maibé to’o iha ne’ebá dehan sistema la di’ak, entaun ami labele foti sertifikadu to’o ohin loron. Tanba ne’e, karik aban ami labele aplika ona tanba loron ba aplikasaun nian besik termina ona, hein fulan-neen (6) tan mak ami foin bele aplika fali, maibé importante mak dokumentu ne’e iha ona ami-nia liman,” nia hateten.
Sorin seluk, aplikante Olga Lauricha Lopes hateten hatama ona dokumentu iha loron tersa (09 Setembru 2025) maibé seidauk bele foti tanba sistema avaria.
“Ha’u-nia dokumentu hatama iha loron tersa ne’e, maibé seidauk hetan sertifikadu tanba razaun sistema ladi’ak maibé ha’u pasiénsia hein nafatin. Hakarak realiza duni ha’u-nia mehi atu ba servisu iha Nova Zelandia,” nia dehan.
Tuir oráriu ne’ebé Sekretária Estadu Formasaun Profisionál no Empregu (SEFOPE) fó sai kona-ba vaga servisu Nova Zelandia nian sei termina iha loron 12 fulan-Setembru 2025.
Jornalista : Felicidade Ximenes
Editór : Cancio Ximenes
