DILI, 11 Setembru 2025 (TATOLI)—Ministériu Solidariedade Sosiál no Inkluzaun (MSSI) no Ajénsia Teknolojia Informasaun no Komunikasaun Timor, Institutu Públiku (TIC Timor, I.P- sigla portugeza), Kinta ne’e, estabelese Nota Entendimentu (MoU-sigla ingleza) hodi asegura dadus ema vulneravel sira iha Timor-Leste (TL).
Ministra Solidariedade Sosiál no Inkluzaun, Verónica das Dores hateten asina akordu ida-ne’e importante tebes tanba oinsá atu asegura privasidade ema idak-idak nian liuliu ema vulneravel sira.
“Serimónia ohin ne’e importante liu. Dahuluk TIC Timor disponivel no prontu atu koopera no servisu hamutuk ho MSSI atu asegura dadus konfidensiál ligadu ho ema-nia privasidade. Daruak, atu estabelese rede ida-ne’e liuliu atu atende vítima violénsia bazeia ba jéneru, vítima violénsia doméstika, vítima labarik minoridade,” Ministra Verónica dehan iha Kaikoli, Dili, Kinta ne’e.
Notísia relevante: TIC Timor organiza semináriu hodi troka ideia kona-ba transformasaun dijitál
Iha fatin hanesan, Diretór Jerál MSSI, Florêncio Pina Dias Gonzaga informa akordu ida-ne’e ligadu ho nivel servisu tékniku entre Diresaun Jerál Servisu Korporativu Diresaun Jerál Protesaun Sosiál ho TIC Timor ba prosesu estabelesimentu atu apoiu ba vítima violénsia bazeia ba jéneru, asuntu labarik iha risku, joven sira iha perigu no mós fasilita informasaun balun ligadu ho vulnerabilidade sira iha Timor-Leste.
Nia adianta, kooperasaun ba prestasaun servisu futuru MSSI opera hotline ida-ne’e, maibé nafatin iha kooperasaun no iha apoiu husi TIC Timor ba nia prosesu tomak, lala’ok liña ida-ne’e nune’e labele hetan difikuldade.
Nune’e mós, iha akordu ida-ne’e sei diskute kle’an kona-ba fonte orsamentu no kbi’it parte rua ninian atubele koopera hamutuk.
“Ho akordu tékniku ida-ne’e sei fasilita ami di’ak liután para depoiz ami bele opera liña solidária ba vítima violénsia bazeia ba jéneru, asuntu labarik no foinsa’e sira-ne’ebé iha risku,” nia hatutan.
Iha fatin hanesan, Diretora Ezekutiva Interina TIC Timor, Helen Esmeralda Catarina Gomes agradese ba MSSI ba konfiansa servisu hamutuk ho TIC Timor. Nune’e, hahú husi asina akordu TIC Timor prontu atu serbisu hamutuk atu apoiu servisu dijitalizasaun nian liuliu ba maluk sira ne’ebé mak vulneravel tebes no presiza ajuda husi servisu MSSI nian.
“Akordu ida-ne’e sei atende servisu ba emerjénsia nian iha ita-nia rai. Apoiu ba instalasaun operasaun no manutensaun ba liña solidariedade nian. Ami mós iha esperansa katak liuhusi prestasaun servisu dijitál ne’ebé ita realiza hamutuk sei fasilita apoiu vulneravel sira iha maneira robusta no sustentavel,” nia dehan.
Nia hatutan, husi akordu ida-ne’e, TIC Timor sei apoiu másimu no mós sei asegura dadus sira ne’ebé entre TIC Timor ho MSSI nia ne’ebé iha no mós liuliu dadus ne’ebé ema vulneravel iha. Ida-ne’e servisu ida-ne’ebé sensitivu tebes. Fiar katak hotu-hotu sei asegura dadus vulneravel no vítima sira ne’ebé iha.
Jornalista: Osória Marques
Editór: Xisto Freitas da Piedade
