SEI oferese formasaun lideransa ba feto potensiál sira iha Vikeke
VIKEKE, 11 Setembru 2025 (TATOLI)—Ekipa Sekretaria Estadu Igualdade (SEI) oferese formasaun kona-ba lideransa nian ba feto potensiál sira iha Munisípiu Vikeke.
Reprezentante Diretór Jerál SEI, Avia Britod Costa hateten SEI nia programa prioridade ida mak partisipasaun polítika hodi promove feto ba lideransa komunitária, entaun haree ba realidade iha Munisípiu Vikeke SEI identifika xefe suku sira mane hotu, tanba feto konkorre iha eleisaun, maibé sira la pasa.
“Tanba ne’e, ami hili Munisípiu Vikeke hodi oferese formasaun ba feto potensiál sira no estudu komparativu ba sira. Formasaun ne’e ami fahe ba parte rua. Ida, formasaun lideransa no ida seluk ami lori xefe suku feto eleitu husi munisípiu tolu hanesan Xefe Suku Gricenfor, Munisípiu Dili, Xefe Suku Aiteas, Munisípiu Manatutu no Xefe Fatukeru, Munisípiu Ermera ne’ebé hato’o sira-nia esperiénsia no susesu sira ba ita-nia feto potensiál sira iha Munisípiu Vikeke, atu enkoraja filafali feto sira seluk kandidata-aan ba xefe suku,” Avia Britod Costa dehan ba TATOLI iha Salaun Administrasaun Vikeke, Kinta ne’e.
Notísia relevante: AFP-CNE realiza kompetisaun diskursu públiku ba feto potensiál iha Vikeke
Avia aprofunda, liuhusi formasaun no fahe esperiénsia sira-ne’e feto potensiál sira iha Munisípiu Vikeke labele lakon esperansa hodi prepara aan nafatin ba eleisaun sira-ne’ebé tuirmai.
“Formasaun ne’e ami oferese mak matéria lideransa ba feto potensiál sira. Husi matéria sira-ne’e atubele influénsia feto sira, atu iha abilidade ko’alia iha públiku. Ha’u sente formasaun loron tolu ne’e la sufisiente tanba kestaun tempu, maibé bá-oin ami kontinua oferese kapasitasaun ba feto sira,” nia haklaken.
Entretantu, atividade ne’ebé sei hala’o durante estudu komparativu mak fahe esperiénsia nu’udár líder komunitária, vizita suku besik munisípiu no kontinua fó formasaun ba feto potensiál Vikeke ba preparasaun desentralizasaun no podér lokál.
Iha fatin hanesan, Prezidente Autoridade Munisípiu (PAM) Vikeke, Francisco C. S. de Gonzaga Soares, enkoraja feto sira hola-parte iha vida polítika tanba feto importante iha prosesu foti desizaun nian.
“Ha’u hakarak enkoraja nafatin feto sira no ha’u fiar katak feto Munisípiu Vikeke bele. Nune’e, ha’u husu feto sira tenke konfia ba ita-nia aan no fiar ita-nia aan katak bele. Feto potensiál ida mak espesiál iha família no iha sosiedade. Daudaun ne’e, ita prepara aan ba desentralizasaun no poder lokál. Vikeke iha ona feto potensiál para avansa ba eleisaun munisipál,” nia tenik.
Formasaun loron tolu ne’e hahú Tersa no enserra iha Kinta ne’e, iha-ne’ebé partisipa husi feto potensiál husi postu lima iha Munisípiu Vikeke.
Jornalista: Vitorino Lopez da Costa
Editór: Xisto Freitas da Piedade
