SEKOMS presiza lista naran jornalista 10 atu eskola iha UNTL-UCT-UNITAL

DILI, 11 Setembru 2025 (TATOLI)–Sekretáriu Estadu Komunikasaun Sosiál (SEKOMS), Expedito Dias Ximenes, hateten kooperasaun ne’ebé Governu halo ho Universidade Universidade Nacional Timor-Lorosa’e (UNTL), Universidade Katólika Timor (UCT-sigla portugés) no Universidade Orientál Timor-Lorosa’e (UNITAL) presiza lista jornalista na’in-10 husi dirijente mídia sira iha etapa dahuluk 2026.
Notísia Relevante: Reitór UNTL konsidera presiza iha bolsa estudu ba jornalista
“Kona-ba asuntu ne’e SEKOMS servisu hamutuk ho Ministériu Ensinu Superiór Siénsia no Kultura, enkontru ho dirijente mídia nian halo hotu ona maibé agora dirijente sira mak seidauk haruka jornalista sira nia-naran mai. Ita koopera ho eskola tolu mak UNTL, UCT no UNITAL iha área komunikasaun sosiál nian, ita presiza jornalista na’in-10 iha tinan 2026 nian,” Governante ne’e hateten ba jornalista sira hafoin aprezenta palestra ba estudante Komunikasaun Sosiál UNTL sira iha semináriu durante loron tolu ho tópiku “Importánsia Komunikasaun Sosiál iha Demokrasia Nasionál,” iha Kampus UNTL, Kaikoli, kinta ne’e.
Tanba ne’e, nia husu ba dirijente mídia hotu atu haruka naran jornalista nian ba SEKOMS atu nune’e bele halo prosesu ba oin.
“Ami hato’o ona karta ofisiál ba dirijente mídia ida-idak, iha ne’ebá mai tau mós kritéria katak Governu fasilita jornalista sira atu eskola tanba ita-boot sira iha ona esperiénsia kona-ba prátika, maibé presiza mós iha teoria jornalizmu nian. Entaun, ami fasilita atu jornalista sira bele eskola iha klase extensaun, entaun husu ba mídia sira atu haruka sira-nia jornalista nia naran mai ami, atu haree nia prosesu ba oin,” nia hateten.
Nia esplika, kritéria atu asesu ba eskola mak jornalista tenke servisu kompleta ona tinan lima (5) iha instituisaun ne’ebé hakna’ar-an ba.
“Dirijente mídia sira haruka nia jornalista másimu na’in-tolu (3), maibé ba iha Ministériu Ensinu Superiór Siénsia no Kultura mak sei halo selesaun, bainhira prienxe rekezitu bele liu atu eskola, se la prienxe rekezitu mak sei la liu ba eskola,” nia dehan.
Iha fatin hanesan, Xefe Departamentu Komunikasaun Sosiál UNTL, Roberto da Costa Pacheco, hateten, sira-nia parte atu koopera ho Governu hodi haruka jornalista sira eskola liuliu iha Departamentu Komunikasaun Sosiál.
“UNTL uluk kedan iha kooperasaun di’ak tebes ho jornalista sira, liuliu Asosiasaun Jornalista nian hanesan, Timor –Leste Press Union, Asosiasaun Jornalista Timor-Leste no seluk tan hodi haruka jornalista sira mai eskola. Balun konsege eskola hotu ona maibé ikus kooperasaun ne’e laiha tiha maibé agora Governu ida-ne’e hakarak hamoris fali kooperasaun ne’e mak ami prontu atu simu jornalista sira eskola iha ne’e,” nia hateten.
Nia hatutan, Departamentu Komunikasaun Sosiál UNTL nia odamatan nakloke ba jornalista sira atu kontinua estudu maibé agora daudaun laiha klase extensaun maibé so iha klase regulár.
“Ita agora laiha klase extensaun maibé pedidu husi SEKOMS nian mai Universidade katak loke klase extensaun ba jornalista sira, ami Departamentu prontu kolabora maibé laiha entaun ami Departamentu mós sei la halo buat ida,” nia hakotu.
Notísia Relevante: SEKOMS-Embaixadora Portugál diskute kona-ba formasaun ba jornalista sira
Jornalista : Hortencio Sanchez
Editór : Cancio Ximenes

