UPM falta rekursu umanu hodi koloka iha postu vijilánsia estabelesidu
DILI, 11 Setembru 2025 (TATOLI)—Unidade Polísia Marrítima (UPM) daudaun ne’e falta rekursu umanu hodi koloka iha postu vijilánsia estabelesidu.
UPM estabelese ona postu vijilánsia iha área tasi-ibun Beakou ( Atabae), tasi-ibun Watabo (Baukau), Beasu (Vikeke), Portu Dili, Ataúru, Betanu, Suai, Oekusi, Com (Lautein), Portu Tibar, Manatutu, tasi-ibun Likisá no fatin rua seluk tan.
“Postu vijilánsia 12 mak funsiona hela, ita iha postu vijilánsia balun mak seidauk koloka rekursu, liuliu iha Suai no Oekusi, ita presiza rekursu. Aleinde ne’e, ita mós sei iha tan. Ita-nia planu atu koloka rekursu iha postu Com, kompañia ida ita sei estabelese tan iha parte Súl, maibé ita presiza rekursu,” Komandante UPM, Superintendente Polísia Eugénio Pereira hateten, iha Palasiu Governu, Kinta ne’e.
Nia dehan, UPM daudaun ne’e koloka ona ró Lanhas de Ação Rápida (LAR) iha postu vijilánsia iha Biakou, Ataúru no Com.
“Fasilidade hirak ne’e funsiona hela no atividade operasaun tasi la’o ho normál. Foin lalais iha Biakou, LAR ida hasoru problema maibé ekipa ida tuun rezolve ona,” Komandante UPM akresenta.
Notísia relevante : Komandu PNTL halo promosaun diviza ba membru UPM na’in-132
Komandante Eugénio relata, postu vijilánsia sira iha seksaun, ne’ebé estabelese iha nível kompañia tantu iha nível postu ida tenta ona atu haree atu ajusta ho ninia regulamentu orgánika ne’ebé mós haree ba lei orgánika atubele halo alterasaun ba estrutura Polísia Marrítima husi kompañia tuun to’o ba pilotaun.
“Maibé ne’e depende ba rekursu atu ajusta hodi implementa tuir estrutura foun. Tanba ne’e, prioridade ba UPM mak haree mós iha rekursu umanu,” nia katak.
Nia rekoñese katak rekursu ne’ebé durante ne’e Komandu UPM koloka iha postu vijilánsia sira sempre atua situasaun ho di’ak.
“Ita bele haree iha atividade kontra bandu nian kuaze iha tasi menus, sira orienta liu sira-nia atividade kontra bandu ba liu iha rai maran. Tanba ne’e mak ita haree iha duni mudansa, iha vijilánsia ne’ebè mak ita halo iha área kosteira, liuliu iha parte súl norte nian kuaze atividade kontra bandu menus,” Komandante hato’o.
Durante ne’e komandu seidauk bele halo rotasaun tanba sei haree mós ba ajustamentu estrutura iha UPM tuir lei orgánika Polísia Nasionál Timor-Leste (PNTL) nian.
UPM mai ho objetivu fó seguransa iha área tasi-ibun no domíniu públiku marritima. Monitoriza, proteje ambiente marrítima, inklui riku-soin tasi okos.
Aleinde ne’e, mós fó vijilánsia iha fronteira marritima no iha koordenasaun ho forsa Navál FALINTIL-Forsa Defeza Timor-Leste (F-FDTL).
Unidade Marrítima nu’udar parte ida husi Sistema Autoridade Marrítima no estabelese ona espesifikamente atu fó vijilánsia no monitoriza área tasi-ibun no tasi sira Rstadu nian, bazeia ba Lei Orgánika PNTL, Dekretu-Lei 9/2009, Artigu 32(1). Misaun ida-ne’ebé inklui iha kuadru autoridade marrítima mak atu salvaguarda ema-nia moris iha tasi no atu fornese servisu salva marrítimu nian (artigu 32 (2) (f)).
Totál membru UPM efetivu hamutuk na’in-120, hodi fahe ba área tolu mak hanesan serbisu iha postu (Batugade, Atabae, Atauro, Beloi, portaun portu Dili, sionál Dili no postu Com), serbisu iha ró (ró NRTL Lusitania, NRTL Dili, NRTL Hera, NV Timor-Leste, speed boat 12), no serbisu iha kuartel UPM.
Jornalista : Natalino Costa
Editora : Julia Chatarina
