DILI, 12 Setembru 2025 (TATOLI)—Ekipa International Trade Union Confederation (ITUC) hasoru malu ho Primeiru-Ministru, Xanana Gusmão, hodi diskute kona-ba problema balun ne’ebé Konfederasaun Sindikatu Timor-Leste (KSTL) enfrenta, liuliu joven ho empregu.
Ekipa ITUC lidera hosi Sekretáriu Rejionál, Shoya Yoshida, ne‘ebé énfaze kona-ba diálogu sosiál konstrutivu entre traballadór sira ho sindikatu atu bele garante diálogu ne‘ebé di‘ak ba dezenvolvimentu ida inkluzivu.
“Dálogu sosiál konstrutivu ne’ebé iha, hetan apoiu hosi Governu Timor-Leste, liuliu atu ita haree mós kona-ba aumentu saláriu mínimu nomós demanda pesoál ligadu ho traballadór sira”, Shoya Yoshida hateten iha Palásiu Governu, ohin.
Primeiru-Ministru konkorda atu hametin liután asuntu ida-ne’e liuhosi lei sira ne‘ebé iha atu regula no hametin kooperasaun entre KSTL no mós Kámara Komérsiu no Indústria Timor-Leste (CCI-TL) hodi hadi’a serbisu sira ligadu ho traballadór no empregadór sira garantia dezenvolvimentu ida di’ak liu.
Konfederasaun Sindikatu Internasionál mós hato‘o impresaun maka’as ba povu Timor-Leste ne’ebé ho karáter amigavel tebes, tanba hatudu perspetiva ida katak sei iha futuru ida ne‘ebé di‘ak.
“Ita diskuste kona-ba joven no empregu. Governu tenke ezerse ninia knaar ida importante atu fornese treinamentu hodi eleva foinsa’e sira-nia abilidade ba serbisu. KSTL, Trade Union ho empregadór sira tenke ezerse idaidak nia knaar atu ajuda foinsa’e sira hodi bele asesu ba empregu, nune‘e hametin sira-nia serbisu iha rai-laran”, hateten.
ITUC rasik mak lian globál ba traballadór sira iha mundu tomak.
ITUC nia misaun prinsipál atu promove no defende traballadór sira-nia direitu no interese liuhosi kooperasaun internasionál entre sindikatu sira, kampañia globál sira no advokasia ho instituisaun globál xave sira.
Ninia área prinsipál sira atividade nian inklui: sindikatu sira no direitu umans; ekonomia, sosiedade, no servisu fatin; igualdade no laiha diskriminasaun; no solidariedade internasionál.
ITUC adere ba prinsípiu sira demokrasia no independénsia sindikatu nian. Ida-ne’e governa hosi kongresu mundiál kuadrenál sira, Konsellu Jerál ida, no Konsellu Ezekutivu ida.
ITUC nia organizasaun rejionál sira maka Organizasaun Rejionál Ázia-Pasífiku (ITUC-AP), Organizasaun Rejionál Afrikana (ITUC-AF), no Organizasaun Rejionál Amerikanu (TUCA). ITUC koopera ho Konfederasaun Uniaun Traballadór Europeia, inklui liuhosi Konsellu Rejionál Pan-Europeu.
ITUC mantein relasaun besik ho Federasaun Sindikatu Globál sira no Komité Konsultivu Sindikatu nian ba OCDE (TUAC). Nia serbisu besik ho Organizasaun Internasionál Traballu nian no Ajénsia Espesializada ONU nian sira seluk.
Jornalista: Arminda Fonseca
Editora: Maria Auxiliadora
