OEKUSI, 12 Setembru 2025 (TATOLI) – Sekretáriu Estadu Elétrisidade, Água no Saneamentu (SEEAS), Santos Noronha, hala’o enkontru kortezia ho Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, atu koordena kona-ba setór elétrisidade no água saneamentu iha Oekusi iha futuru bele aplika taxa ba bee-moos no kontinua monta prepagu ba nível sub-rejionál sira inklui saneamentu báziku hodi aumenta reseita ba kofre Estadu.
“Ami mai koordena ho estrutura foun iha RAEOA, atu-bele diskute kona-ba setór elétrisidade bee ho saneamentu nian iha Oekusi. Iha reuniaun ne’e, ita hetan pontu importante balun ligadu ho ita-nia setór eletrisidade, bee ho saneamentu, primeiru ita identifika dezafiu obstáklu sira-ne’ebé durante ne’e, ita-nia tékniku sira iha terrenu enfrenta, maibé ohin ami ho diretór sira no Prezidente Autoridade, halo diskusaun konsege hetan nia solusaun, no planu ba oin atu implementa serbisu ba setór sira-ne’e,” Sekretáriu Estadu Eletrisidade, Água no Saneamentu (SEEAS), Santos Noronha dehan hafoin enkontru iha PA RAEOA iha Oekusi.
Notísia relevante:Abitante Taiboko-Oekusi husu DSAS hadi’a kanu bee-moos
Governante ne’e, hateten, kona-ba investimentu sira-ne’ebé daudaun la’o iha Oekusi, hanesan solar PV, aplikasaun taxa ba utilizasaun bee-moos inklui taxa ba eletrisidade. Tan ne’e, antes aplika iha Oekusi, presiza halo diskusaun profundu, depois ita haree aspetu sosiál, kulturál hodi ajusta mak foin bele implementa.
Tanba iha área rurál liu-liu Oésilo, Pássabe, Nítibe inklui Pante Makasar sorin, maioria seidauk monta prepagu, tan ne’e iha futuru sei iha akizisaun ba prepagu nune’e bele kobre konsumidór sira hotu, inklui aumenta sentru atendimentu públiku ba postu fatin fa’an pulsa nian atu hakbesik ba konsumidór sira, tanba durante ne’e konsentra liu iha edifísiu EDTL Oekusi.
“Kona-ba utilizasaun bee-moos la tuir nesesidade, ida-ne’e falta konsiénsia umanu, talves ita-nia komunidade sira, Governu fasilita instala kontadór ona, maibé tan de’it konsiénsia ladun iha, entaun estraga. Tan ne’e, agora ita mai halo diskusaun ba oin ita sei aplika taxa ba ema hotu ba utilizasaun bee-moos,” nia hateten.
Notísia relevante:Janeiru to’o Maiu, EDTL Oekusi kontribui reseita rihun $36 ba kofre Estadu
Iha biban ne’e, Prezidente Autoridade RAEOA, Régio da Cruz Salu, konsidera polítika importante atu aplika, nune’e ema hotu bele asesu ba liña elétrika no bee-moos nian.
“Obrigasaun primaria ne’e, sei la’o liuhusi serbisu institusionál desentralizadu hahú husi kna’ar desizaun administrasaun públiku nian, mezmu desentralizasaun seidauk mai. Semana kotuk ha’u fó ona orientasaun ba Diresaun Rejionál Infraestrutua no EDTL, katak to’o Dezembru 2025, estádiu iluminasaun hot-hotu iha zona urbana liuliu fatin sira-ne’ebé sei nakukun, tenke hetan naroman, nune’e planu ba futuru aplikasaun taxa la’o di’ak, liu-liu kestaun bee-moos nian, tanba ema barak iha haree forma tuir dalan ho masa atu buka bee, ida ita tenke regula didi’ak atu ema hotu bele hetan bee-moos,” nia hateten.
Notísia relevante:Abitante Pássabe husu EDTL Oekusi hadi’a fiu eletrisidade
Entretantu, tuir dadús husi Departamentu Eletrisidade de Timor-Leste (EDTL) Oekusi, daudaun ne’e instala ona prepagu hamutuk rihun-15, maioria iha área urbana, hahú husi fronteira Sakato suku Nípani ba to’o suku Lifau perténsia tasi-ibun, no sa’e ba área rurál foin to’o de’it aldeia Oébaha suku Bobometo sub-rejiaun Oésilo.
Jornalista: Abílio Elo Nini
Editór: Rafael Ximenes de A. Belo
