BOBONARU, 15 Setembru 2025 (TATOLI) – Veteranu António Lema Bere “Leobalu” eleitu ba Prezidente Konsellu Munisipál Kombatente Libertasaun Nasionál (CMCLN, sigla portugés) munisípiu Bobonaru nian ba períodu 2026 to’o 2030, hodi substitui Jaime dos Santos Romão “Dotim” ne’ebé sei termina mandatu iha Dezembru 2025.
Prezidente Meza, Jacinto Viegas Vicente “Roke”, esplika katak iha segunda konferénsia CMCLN Bobonaru rezulta pakote António Lema Bere “Leobalu” mak eleitu nu’udar prezidente hafoin halakon pakote B, ne’ebé lidera husi Vise-Prezidente sesante Veteranu Lúcio Dinis Marques “Onsar” ho totál votu 195 kontra 96.
“Rezultadu koferénsia, asistente Leobalu ho nia ekipa mak sai vensedór”, Roke hateten hafoin eleisaun ne’ebé realiza iha Jinazíu Maliana, ohin.
Prezidente eleitu, António “Leobalu”, promete katak durante mandatu sei submete de’it planu no polítika Governu no Konsellu Nasionál Kombatente Libertasaun Nasionál, liuliu rezolve problema veteranu no haloot restu mortál ne’ebé daudaun ne’e konserva hela iha usoáriu.
Aleinde ne’e, Asistente Polítika Rejiaun Norte ne’e promete sei haku’ak veteranu no kombatente sira hotu no la haree ba kór partidu, rasa no organizasaun, tanba veteranu ne’e ida de’it.
“Ha’u sei la husik Sekretáriu Zona ho Nurep sira, Selkom, Kaixa no Estafeta sira atu hamutuk no haree problema sira ne’e. Ha’u sei simu imi hotu nia opiniaun. Ami hanesan ema rezisténsia, ami-nia orientasaun ba imi hotu, ita-boot sira mak hatene ita-nia maluk kombatente sira. Ita deside hamutuk tuir lei ne’ebé vigora iha estatutu Kombatente Libertasaun Nasionál”, nia hateten.
Leobalu mós sei serbisu hamutuk ho Ministeriu Asuntu ba Kombante Libertasaun Nasionál no Konsellu Nasionál atu disemina informasaun ba veteranu nia oan sira ne’ebé envolve iha arte marsiál no rituál.
“Sira laiha konxiénsia depois veteranu ho veterana sira-nia naran mak sai fo’er. Ha’u-nia mensajen ba kombatente no veteranu sira, katak ita tenke organiza ita-nia an, labele monu ba lasu sira hodi estraga ita-nia nasaun”, nia hakotu.
Iha konferénsia loron dahuluk, konfrensista sira reeleitu veteranu Jacinto “Roke” ba Komisáriu Nasionál munisípiu Bobonaru ba períodu 2026-2030.
Atividade ne’e partisipa husi konfrensista 302 husi postu administrativu Atabae, Balibó, Kailaku, Maliana, Bobonaru no Lolotoe.
Notisía relevante: Governu inaugura edifísiu Konsellu Munisipál Kombatente Libertasaun Nasionál Bobonaru
Jornalista: Sergio da Cruz
Editora: Maria Auxiliadora
