BOBONARU, 10 Marsu 2025 (TATOLI)—Governu liuhusi Ministériu Asuntu Kombatente Libertasaun Nasionál MACLV, sigla portygés), segunda ne’e, inaugural edifisíu foun Konsellu Munisipál Kombatente Libertasaun Nasionál (CMCLN, sigla Portugués) munisípiu Bobonaru ne’ebe lokaliza iha bairu SMP1, aldeia Atulaka, suku Lahomea, postu Maliana Vila.
Notísia Relevante: Veteranu sira tenke unidade hodi kontribui bá dezenvolvimentu nasionál
Komisáriu Konsellu Kombatente Libertasaun Nasionál Munisípiu Bobonaru, Alfredo Cipriano Amarál ‘Maulear’, konsidera edifisíu foun ne’e sai hanesan ‘Uma-Lulik’ ida hodi halibur veteranu no kombatente sira hotu husi suku 50, postu administrativu neen (6).
Edifisíu foun ne’e Governu harii atu fasilita funsionáriu sira halo servisu iha fatin dignu no sai mós hanesan Bibilioteka ba jerasaun foun sira-ne’ebé hakarak buka hatene kona-bá istória luta libertasaun nasionál espesiálmente iha Bobonaru.
“Ha’u hato’o agradesimentu ba Governu no parte hotu, imi hotu nia esforsu ohin loron bele sai edifisíu ida hanesan uma-lulik ba ita kombatente no veteranu sira hotu. Lae, ita rihun ba rinhun iha Bobonaru, 12,900 resin, sai veteranu mais rihun 15 iha Bobonaru ita laiha uma ida. Ita empresta ema-nia uma, ita ba mak hanesan bainaka fali,” Nia hato’o intervensaun iha serimónia inaugurasaun edifísiu foun ne’e.
Iha 0portunidade ne’e mós, Maulear husu ba funsionáriu sira atu bele kuida uma ne’e no presta servisu ba asuntu veteranu ho responsabilidade.
Reprezentante Ministru Asuntu Kombatente Libertasaun Nasionál, Sekretariu Rejiaun IV, Jorge Martins ‘Morin’, kongratula kompañia implementadór tanba haree katak obra ne’e furak no kualidade di’ak.
“Uma ida-ne’e harii tanba ita hetan kooperasaun ho parte hotu-hotu, Terra Propriedade, Prezidente Autoridade, xefe suku, xefe aldeia no pare hotu-hotu, sivíl no militár, hotu-hotu nia hakarak mak harii. Ohin loron, ita hotu-hotu mai realiza serimonia inaugurasaun, ita agradese ba kompañia tanba uma ida-ne’e. Ita ko’alia karik dehan, ita-nia oan feto ida ita fó hatais nia ulun to’o ain, ita haree ba ninia aspeitu ne’e furak tebe-tebes, ne’e para ita-nia responsavél Munisípiu sira bele goza,” nia dehan.
Sekretáriu Autoridade Munisípiu Bobonaru ba Asuntu Administrasaun no Finansa, Domingos da Costa, konsidera ho edifisíu foun ne’e mak veteranu no kombatente sira iha Bobonaru foin iha dignidade, tanba durante ne’e okupa espasu ida iha areadór Autoridade Munisípiu Bobonaru ne’ebé iha liu kotuk.
“Ha’u haree ida-ne’e la valoriza veteranu sira tanba veteranu sira hela fali iha kotuk. Fatin ida-ne’e merese tau eskritóriu veteranu nian tanba fatin ida-ne’e mos fatin istóriku ba luta Libertasaun Nasionál. Ho fatin foun ida-ne’e, hau husu veteranu sira servisu ba, imi katuas hotu ona, jerasaun foun sira mai daudaun, istória jerasaun foun sira tenke toman/ Se la toman, istória kotu, veteranu sira kaer liman la toman ona, entaun imi tenke sólidu nafatin, tanba agora ema balun hakarak estraga ita,” nia hateten.
Obra ne’e ezekuta husi Kompañia lokál Hugo Amor Unipesoál, Lda, ho kustu rihun $98,196.79 ho durasaun kontratu fulan lima (5).
Notísia Relevante: Veteranu Bobonaro husu Governu labele demora haloot restu mortál sira iha osoáriu
Jornalista : Sérgio da Cruz
Editór : Cancio Ximenes
