DILI, 15 Setembru 2025 (TATOLI)—Bee Timor-Leste, Empreza Públika (BTL, E.P) liuhusi Diresaun Operasaun no Manutensaun Bee no Saneamentu kontinua arrekada reseita kada fulan hamutuk $10.000,00 ba kofre Estadu, liuhusi fontr operasionál tanke bee moos ba komunidade ne’ebé presiza bee-moss iha kapitál Dili.
Diretór Operasaun no Manutensaun Bee no Saneamentu, Aleixo dos Santos, informan BTL, E.P mós iha karreta tanke tula bee-moos hamutuk haat ne’ebé loro-loron halo fornesementu bee-moos ba komunidade sira-ne’ebé rejistadu no kuaze kada loron sira rejista benefisiáriu 20-resin.
“Benefisiáriu barak liu mak sosa bee husi BTL, E.P ne’e pertense hela iha área foho lolon, no sira-ne’ebé presiza bee ho kuantidade barak,” Diretór ne’e informa ba Agênsia Tatoli iha nia kna’ar fatin, Kaikoli, ohin.
Tanke bee nian ho kuantidade litru 5000 ne’e ho folin $12.50, hodi selu ba operasionál no tanke ida fali ho kuantidade kúbiku 80 ne’e ho montante $15.00, maibé atendimentu mak tarde uitoan tanba la’ós BTL de’it mak asesu ba perfurasaun bee fatin hodi ense ba tanke
“Maibé tanke privadu sira mós ba ense hotu bee-moos iha área Komoro B ne’ebé lokaliza besik restaurante Mas Bro nia sorin,” nia informa.
BTL, E.P mós Sempre simu pedidu atu halo ligasaun foun ba zona melloramentu sira hamutuk atus ida liu kompostu husi parte Bekora no Komoro ninian, ida-ne’e pedidu atu ba halo ligasaun ba metru kontadór, entaun daudaun ne’e ekipa téknika BTL, E.P halo ona ligasaun ba metru kontadór ba benefisiáriu sira.
“Ligasaun metru kontadór ne’ebé asesu tama ona ba sistema ne’e hamutuk millaun $9-resin,” nia hateten.
Pedidu ba halo ligasaun bee-moos ne’e kada loron sira rejista benefisiáriu na’in-20-resin, signifika komunidade mós hahú hatene ona katak nesesidade bee ne’e importante no sira hakarak rejistu tuir dalan legál nian.
“Ita agradese tebes ba komunidade hatene ona oinsá atu kontribui hodi asesu bee tuir dalan ne’ebé mak loos,” nia dehan.
Jornalista : Alexandra da Costa
Editór : Cancio Ximenes
