DILI, 15 Setembru 2025 (TATOLI) – Bankada Opozisaun husi Partidu Libertasaun Populár (PLP) no Frente Revolsionáriu Independente Timor-Leste (FRETILIN) apresia ho asaun manifestante husi Estudante Universitáriu Timor-Leste (EUTL) nia ezijénsia ba Parlamentu Nasionál atu kansela prosesu sosa karreta foun unidade 65.
Xefe bankada PLP, Maria Angelina Sarmento Lopes, reafirma pozisaun katak dezde inísiu hato’o ona proposta la aseita polítika Parlamentu nian atu sosa karreta ho millaun $4,25 ne’ebé tau Orsamentu Jerál Estadu (OJE) 2025.
Nune’e, iha momentu diskusaun iha tinan 2024 aprezenta proposta alterasaun hodi husu hasai osan destina ba sosa karreta ka realoka fali ba setór saúde, edukasaun, tanba povu barak presiza.
Aleinde ne’e, tau iha área agrikultura ne’ebé importante tebes atu dezenvolve no iha sustentabilidade hodi lori reseita iha futuru no hamenus país nia dependénsia ba Fundu Mina-rai.
Maibé proposta referida iha momentu ne’ebá la hetan fatin ba diskusaun, tanba bankada Governu maioria la aseita.
Nune’e, orsamentu ba akizisaun viatura foun aprova ona, maibé momentu ne’ebá laiha sosiedade no estudante atu halo asaun hasoru no bainhira Sekretáriu-Jerál Parlamentu fó sai iha tinan ne’e katak loke konkursu ba públiku no nia prosesu la’o hela mak foin iha reasaun husi públiku.
“Ami lamenta bankada tolu husi CNRT, PD, KHUNTO ne’ebé durante ne’e a-favór ba sosa karreta, teki-teki husu lalika sosa karreta ba Parlamentu Nasionál. Triste tebes ba ami, bainhira estudante sira halo ona asaun mak bankada tolu ne’e hakfodak deside”, nia kestiona.
Bankada agradese ba estudante sira ne’ebé sai hanesan kontrolu sosiál ba desizaun polítika sira. “Maibé, ami kontinua husu ita-boot sira atu halo akompañamentu ba mudansa desizaun ne’ebé ohin [bankada tolu] foti ona”, nia fó hanoin.
Hodi husu ba estudante sira labele haree de’it ba asuntu sosa karreta, tanba problema dezegualidade sosiál no asesu rekursu Estadu nian barak seidauk iha transparénsia.
Iha sorin seluk, Xefe Bankada FRETILIN, Aniceto Longuinhos Guterres, agradese ba manifestante sira tanba bankada Governu muda ona sira-nia pozisaun.
Tanba ne’e, bankada FRETILIN nia pozisaun klara dezde iha debate OJE 2025 no hato’o proposta atu ko’a, tanba haree ba prioridade seluk povu nia nesesidade barak seidauk atende.
“Ida-ne’e mak FRETILIN espera, dezde uluk. Loloos FRETILIN kuandu halo proposta atu hasai osan sosa karreta nian millaun $4-resin, maibé sira [bankada Governu] vota kontra”, dehan.
Notisia relevante: https://tatoli.tl/2025/09/15/cnrt-pd-no-khunto-husu-kanselamentu-ba-sosa-viatura-foun/
Jornalista: Nelson de Sousa
Editora: Maria Auxiliadora
