DILI, 15 Setembru 2025 (TATOLI)—Diresaun Jerál Servisu Rejistu Notariadu iha Ministériu Justisa (MJ), Agostinho Gonsalves Viera, hateten, nia parte seidauk simu keixa ruma kona-ba funsionáriu balun iha Notariadu sai broker ba atendimentu emisaun dokumentu.
“Desde ha’u simu knaar hanesan Diretór Jerál iha Servisu Rejistu Notariadu, to’o agora ha’u seidauk simu keixa ida katak funsionáriu iha Notariadu ida sai broker iha atendimentu emisaun ba Pasaporte, BI (Bilhete de Identidade) no atendimentu ba Rejistu Kriminál inklui sertidaun moris,” Diretór Jerál ne’e informa ba Ajénsia TATOLI, iha nia knaar fatin, Kolmera, Segunda ne’e.
Notísia relevante : Diretór Jerál Notariadu rejeita mosu broker iha atendimentu pasaporte
Nia dehan, bainhira iha komunidade balun sente prejudikadu tanba funsionáriu Notariadu durante atendimentu halo prosesu la’o neneik tanba husu osan, presiza hato’o keixa.
“Karik iha funsionáriu iha Notariadu mak ho atitude nune’e, favór hato’o keixa mai ha’u hodi ha’u halo prosesu ba nia, karik nia hahalok ne’e iha indísiu ba krime ita lori ba dalan legál. Maibé ha’u hateten dala-ida tan katak ha’u seidauk simu keixa formál no informál ne’ebé hateten katak funsionáriu ida naran hanesan ne’e hanesan ne’ebá sai broker, karik iha entaun hatudu provas,” Diretór Jerál katak.
Nia husu ba públiku, karik iha funsionáriu Notariadu balun mak sai broker, bele hato’o keixa hodi prosesa.
Jerente ne’e observa, iha ema balun liuhusi rede sosiál ko’alia katak broker buras iha Notariadu tanba envolve funsionáriu.
“Ita labele ko’alia de’it, maibé hatudu provas mai, kaundu ko’alia mak provas laiha ne’e evidénsia la forte,” nia reforsa.
Jornalista : Natalino Costa
Editora : Julia Chatarina
