DILI, 09 Abríl 2025 (TATOLI)—Diretór Jerál Servisu Rejistu Notariadu, Agostinho Gonçalves Vieira, rejeita mosu broker iha atendimentu pasaporte iha Diresaun Servisu Rejistu Notariadu.
“Ha’u rejeita informasaun ida-ne’e. Atu Komisaun Antí Korrupsaun mak ko’alia dehan notariadu haki’ak broker ne’e ha’u hakarak afirma dala ida tan laiha broker iha servisu atendimentu pasaporte,” Agostinho hateten ba jornalista sira iha nia kna’ar fatin, Kolmera, kuarta ne’e, relasiona ho mosu publikasaun notísia iha jornál balun no mídia online katak notariadu haki’ak broker ba atendimentu pasaporte.
Tuir nia, ema ne’ebé dehan mosu broker iha notariadu ne’e tenke hatudu prova ka faktu sira.
“Sé mak ko’alia ida-ne’e tenke hatudu prova no hanesan Diretór Jerál sei foti desizaun hodi demite kedas nia (broker) husi nia funsaun hanesan funsionáriu iha notariadu karik iha prova,” nia afirma.
Agostinho realsa katak zero toleránsia ba funsionáriu notariadu ne’ebé sai broker.
Nia husu ba públiku, sé de’it, atu ema bainbain ka jornalista karik hetan funsionáriu notariadu mak broker tenke kaer nia lori mai ho kedas faktu sira, sei halo kedas prosesu ba funsionáriu ne’e.
Jornalista: Natalino Costa
Editór: Xisto Freitas da Piedade
